Անհրաժեշտ է լյուստրացիա իրականացնել. բացահայտել Գրիբոյեդովներին, «Եդինայա Ռոսիայի» ու Կոմկուսի շահերի պաշտպաններին

Վարչապետ Նիկոլ Փաշինյանը և նրա ղեկավարած պատվիրակությունը Սպահանի «Արարատ» ակումբում հանդիպել են տեղի հայ համայնքի հազարավոր ներկայացուցիչների հետ: Վարչապետն այնտեղ ծավալուն ելույթ է ունեցել և նշել, որ մենք պետք է ամուր պահպանենք մեր ինքնությունը, անսասան միասնությունը և տուրք չտանք օտարամոլությանը, թույլ չտանք, որ Հայաստանի Հանրապետությունում գործեն քաղաքական գործիչներ, որոնք ավելի շատ օտարերկրյա գործակալներ են, քան իրենց սեփական երկրի քաղաքացիներ. «Մենք՝ որպես ժողովուրդ, այլևս թույլ չենք տալու դավադրություններ մեր պետականության նկատմամբ, թույլ չենք տալու որևէ մեկին մեզ օգտագործել որպես մանրադրամ իր աշխարհաքաղաքական խաղերի մեջ, թույլ չենք տալու, որ մեր իսկ եղբայրներին օգտագործեն մեր պետությունն ավերելու, քանդելու, թուլացնելու համար: Որովհետև սա հայ ժողովրդի միասնության բացառիկ ժամն է, և մենք պետք է վերադառնանք 374 թվական ու թույլ չտանք ամենամեծ դավադրությունը մեր ժողովրդի նկատմամբ»։

ԳԽ պատգամավոր Ազատ Արշակյանը, դրական գնահատելով վարչապետի հայտարարությունը, նշեց՝ անհրաժեշտ է լյուստրացիա իրականացնել: «ԱՄՆ-ում, օրինակ, կա հստակ օրենք՝ օտարերկրյա շահերին սպասարկող ագենտների դեմ, նման օրենք կա նաև Ռուսաստանում։ Այն բոլորովին վերջերս է ընդունվել, ու դրա հետևանքով բավականին շատ լիբերալ, օտարերկրյա ֆինանսավորում ունեցող ՀԿ-ներ, լրատվամիջոցներ փակվեցին կամ պատժվեցին»,- «Առաջին լրատվական»-ի հետ զրույցում ասաց նա։

Արշակյանն ընդգծեց. «Ճիշտ այնպես, ինչպես ծխախոտի վրա գրվում է՝ «Վնասակար է ձեր առողջությանը», այնպես էլ այդ կազմակերպությունների վրա Հայաստանում պետք է արգելք դրվի։ Ես առաջարկում եմ՝ եղբայրաբար, հայերենով, բայց կիրիլիցայով արտագրել Ռուսաստանում ընդունված այդ օրենքը Հայաստանում։ Եվ շատ շուտ կպարզվեն Գրիբոյեդովները, «Եդինայա Ռոսիայի» ու Կոմկուսի շահերի պաշտպանները Հայաստանում։ Նրանց խոսքի վրա պետք է գրվի, որ այս մարդը ներկայացնում է այսինչ պետության շահը»։

Արշակյանը եզրափակեց. «Կարելի է նույնիսկ ռուսերեն տպել, օրենքի խախտումով թող տպվի ռուսերեն, որ արմյաշկաները կարողանան կարդալ ու իմանալ, թե մենք ինչով ենք զբաղված, ու ինչ է արգելված Հայաստանում։ Դա անկախության հռչակագրից հետո կլինի Հայաստանի ինքնիշխանության երկրորդ կարևոր ակցիան»։

Քաղաքագետ Ռուբեն Մեհրաբյանի կարծիքով՝ վարչապետ Փաշինյանի հայտարարությունը շատ կարևոր է, և դրան պետք է հաջորդեն ռեալ քայլեր. «Անհնար է չհամաձայնել այդ պարզ, նույնիսկ աքսեոմատիկ բնույթի ճշմարտության հետ։ Այո՛, Հայաստանում չպետք է լինեն քաղաքական գործիչներ, որոնք իրենց դիրքավորում են ոչ թե որպես ՀՀ քաղաքացիներ, գործում են ոչ թե ՀՀ շահերի օգտին, այլ որպես օտարերկրյա գործակալներ։ Որպեսզի դա չմնա միայն որպես ճշմարտության արձանագրում կամ միայն որպես դեկլարացիա, անհրաժեշտ են նաև որոշակի քայլեր։

Այո՛, այսօր Հայաստանում գործում են կազմակերպություններ, որոնք հստակորեն գործում են ի վնաս Հայաստանի Հանրապետության շահերի կամ զբաղված են ընդդեմ Հայաստանի պրոպագանդայով»,- «Առաջին լրատվական»-ի հետ զրույցում ասաց նա։

Մեհրաբյանը շարունակեց. «Ես չեմ ուզում հիմա անուններ հնչեցնել, դրանք բոլորին են հայտնի՝ սկսած նրանից, որ Հայաստանի Հանրապետության քաղաքացիներին տանում են Սիբիրում բնակեցնում են, վերջացրած պարզ ամենակացնային ու սադրիչ պրոպագանդայով զբաղվող լրատվամիջոցներով, որոնք պարզապես այլ պետության կողմից են ֆինանսավորվում։ Ի վերջո՝ այո՛, Հայաստանը պետք է համագործակցի բոլոր պետությունների հետ՝ ինչքան շատ, այնքան լավ։ Բայց դա չի նշանակում, որ դա պետք է տեղի ունենա ի վնաս Հայաստանի Հանրապետության։ Ես նորից եմ նշում՝ դրա համար պետք են համապատասխան քայլեր, ենթակառուցվածքներ, որոնք դա թույլ չեն տա»։

Մեր զրուցակիցը նշեց. «Հեծանիվ հորինել պետք չէ՝ սկսած Գերմանիայի վերամիավորման օրերից, վերջացրած Արևելյան Եվրոպայի երկրներով, Բալթյան երկրներով… մենք հասկանում ենք, որ տոտալիտար կամ ավտորիտար անցյալը պատմության աղբանոց ուղարկելու համար, այո՛, անհրաժեշտ են այդ լյուստրացիոն քայլերը, թե ինչ ձևերով՝ դա քննարկման հարց է։ Թե երբ դա տեղի կունենա՝ չգիտեմ: Համարեք մեր զրույցը որպես մտքերի փոխանակում այդ հարցերի շուրջ, բայց վարչապետի հայտարարությունը շատ կարևոր է, և դրան պարտադիր պետք է քայլեր հետևեն»։