Այսօր Արցախում լրագրողների հետ հանդիպման ժամանակ ՊԲ հրամանատար Լևոն Մնացականյանը, պատասխանելով լրագրողների բազմաթիվ հարցերին, անդրադարձ կատարեց նաև Ադրբեջանի կողմից նոր զինտեխնիկայի ձեռք բերմանը, մասնավորապես՝ բելառուսական «Պոլոնեզ» համազարկային կրակի ռեակտիվ համակարգերին, իսրայելական Israel Aerospace Industries-ի արտադրության LORA օպերատիվ-մարտավարական հրթիռային համալիրներին, որի հրթիռի տրամաչափը 610 մմ է, առավելագույն հեռահարությունը՝ 300 կմ:
Մնացականյանը նշեց, որ նույնատիպ զենք ունի նաև մեր զինուժը, և խոցելու հնարավորությունները նույնն են. «Բոլորն էլ օպերատիվ մարտավարական հրթիռներ են: Մենք ունենք նույն հնարավորությունները, ինչ Ադրբեջանը, և տարբերություն չեմ տեսնում»: ՊԲ հրամանատարը հաստատեց, որ Պաշտպանության բանակը հարվածային ԱԹՍ-ներ ունի՝ տարբեր տեսակների:
Անցում կատարելով Արցախի ներքաղաքական իրավիճակին՝ ՊԲ հրամանատար Լևոն Մնացականյանը, պատասխանելով «Առաջին լրատվական»-ի հարցին՝ այդ իրավիճակը չի՞ ազդում Զինված ուժերի բնականոն աշխատանքի վրա, ասաց՝ բանակը մեր հասարակության մի մասն է, ինչ-որ բաներ որ կատարվում են, հնարավոր չէ՝ չազդեն:
Նախարարի խոսքով՝ ինքը ահազանգ է ստացել, որ որոշ քաղաքական ուժեր, դրանց անդամները այս կամ այն սպայի ու պայմանագրայինի ստիպում են մասնակցել իրենց հավաքներին՝ դրանից հետո պահանջելով գործընթացում ընդգրկել իրենց ընկերներին, բարեկամներին: «Բայց համաձայն ՀՀ Սահմանադրության՝ զինված ուժերը պաշտպանում են չեզոքություն, իրավունք չունեն անդամակցելու այս կամ այն հասարակական կազմակերպությանը, կուսակցություններին, վճարովի աշխատանք կատարելու: Ահազանգ էր եղել, և վերջին ռազմական խորհրդի ժամանակ ես ևս մեկ անգամ շեշտել եմ, որ ով նման քայլի դիմի՝ կստանա օրենքի համապատասխան արձագանք, ու համարժեք ծառայողական քննություն կնշանակվի»,- հայտարարեց Լևոն Մնացականյանը:
Մեր ճշտող հարցին՝ այդ ահազանգը կապ ունի՞ Արցախի նախագահ Բակ Սահակյանի հրաժարականը պահանջող քաղաքական ուժերի ներկայացուցիչների հետ, Պաշտպանության բանակի հրամանատարը կարճ պատասխանեց՝ ոչ:
