«Պետք է իրավական հիմքերով, դատախազության և դատարանի միջոցով իրավիճակը կարգավորել։ Որևէ ձևով հրահանգի սպասել անիմաստ է, նոր իշխանությունները դատարանի հետ հրահանգով չեն աշխատելու»,-«Առաջին լրատվական»-ի հետ զրույցում նման տեսակետ հայտնեց «Հանուն Հայաստան պետության» ճակատի անդամ Պետրոս Մակեյանը՝ անդրադառնալով «Սասնա ծռեր» խմբի ազատ արձակման հետ կապված ակնկալիքներին
Ինչ վերաբերում է «Սասնա ծռերի» հարազատների և աջակիցների դժգոհությանը հատկապես Արդարադատության նախարարի հնչեցրած գնահատականների առնչությամբ, Պետրոս Մակեյանն ասաց. «Առանձին և անհատական մոտեցումները ես չեմ ուզում ընդհանրացնել։ Վարչապետի այն մոտեցումը, որ քաղբանտարկյալները և «Սասնա ծռերը» պետք է օր առաջ իրավական հիմքերով փորձեն դուրս գալ՝ մենք ընդունում ենք։ «Սասնա ծռերի» հարազատները մտածում են, որ հեղափոխությունը եղել է և իրենց հարազատները պետք է ազատ արձակվեն՝ տրամաբանական ցանկություն է։ Բնական է՝ իշխանության մոտեցումն էլ իրավական հարթության մեջ է, առանց հրահանգի, առանց զանգի՝ դատախազությունն ու դատարանները պետք է օրինական որոշումներ կայացնեն։ Այս երկու մոտեցումները կարող է հակադրության մեջ հայտնվել. խնդիրը սա է»,։
Հարցին, թե չունե՞ն մտավախություն, որ դա կարող է գործընթացին վնասել, Պետրոս Մակեյանը պատասխանեց. «Իհարկե ունենք նման մտավախություն, բայց յուրաքանչյուրս՝ այդ թվում նաև ես ամեն ինչ անում ենք, որ այդ գործընթացը կանգնեցնենք, դրանից կարող են օգտվել հակահեղափոխականները։ Նրանք արդեն գործում են, ականջները երևում է»։
Պետրոս Մակեյանին խնդրեցինք մեկնաբանել նաև «Սասնա ծռեր» խմբի անդամ Վարուժան Ավետիսյանի հայտարարությանը՝ ի պատասխան վարչապետ Նիկոլ Փաշինյանի՝ «Սասնա ծռեր» խմբին առնչվող մոտեցումներին.«Անձամբ չեմ կարդացել ու չեմ էլ ցանկանում մեկնաբանել, ամբողջական տեքստին ծանոթ չեմ»։
Միևնույն ժամանակ Պետրոս Մակեյանը նշեց. «Միանշանակ է, որ «Սասնա ծռերը» կարևորագույն հանգրվան էին տեղի ունեցածին։ 10-20 տարի այս գործընթացը կաթիլ առ կաթիլ հասունանում էր և «Սասնա ծռերը» դարձան նախավերջին հանգրվանը, որին հաջորդեց մեր այս պայծառ ու լուսավոր հեղափոխությունը»։
Լուսանկարը՝ Photolure-ի
