Հայաստանցի սպառողներիս համար «Գազպրոմից» գազ գնող «ՀայՌուսգազարդը» արդեն ամբողջությամբ դարձավ «Գազպրոմի» սեփականությունը, բայց դեռ մարդիկ կան, որ խոսում են «սահմանի վրա» գազի ինչ-որ գնից: Ռուսական մի ընկերություն իրեն ամբողջությամբ պատկանող ընկերություններից մեկին գազ է վաճառում, բայց Հայաստանի պաշտոնյաները մոգոնել են «սահմանի վրա» գազի գին հասկացությունը ու շարունակ կրկնում են այն: Եվ ՌԴ նախագահ Վլադիմիր Պուտինի հայտարարությունը, թե Հայաստանը 1 խմ-ի համար այսուհետ կվճարի մոտ 190 դոլար` գործող 270-ի փոխարեն, մատուցվում է հանրությանը որպես բարի ավետիս:
Նախ` Հայաստան այլևս չկա` որպես գազ գնող: Ավելի ճիշտ` չկար այն ժամանակվանից, երբ «ՀայՌուսգազարդի» բաժնետոմսերի մեծ մասն անցավ «Գազպրոմին»: Հիմա, երբ «ՀայՌուսգազարդն» ամբողջությամբ դարձավ «Գազպրոմի» սեփականությունը, Հայաստան պետության մասին` որպես գնորդ, խոսելն ընդհանրապես աբսուրդի է նմանվում:
Երկրորդ` այդ` իբր էժանացումը ընդհանրապես չի ազդելու վերջնական սպառողներիս վրա, թեև երեկ որոշ մարդիկ փորձում էին դարձյալ մոլորության մեջ գցել հանրությանը: «Ես թեմայի մեջ չեմ խորացել, ավելի լավ է հարցը նախարարներին ուղղեք, բայց կարծում եմ, որ գազի գնի մեղմացման խնդիրը կլուծվի, մեր քաղաքացիները գազը կսպառեն այն գնով, ինչ Ռուսաստանի քաղաքացիները»,- հայտարարել է ԱԺ Հանրապետական խմբակցության ղեկավար Գալուստ Սահակյանը: Գազի գնի «մեղմացման» խնդիրը, սակայն, սովորական քաղաքացիների ու գործարարների համար չի լուծվելու և նույն Արմեն Մովսիսյանը մի քանի անգամ դա ասել է: «Հաշվարկները ցույց են տալիս, որ գազի գնի թանկացում, հավանաբար, չի լինի, բայց էժանացում նույնպես չի լինի, քանի որ այն գլխից մենք ունեինք փոխհատուցման մասին պայմանավորվածություն: Մաքսային միություն մտնելու մեր հայտարարության պահից էներգետիկ հարկերը չեն կիրառվի. դրա համար որոշակի պրոցեդուրաներ կան, որպեսզի մենք ազատվենք այդ երեսուն տոկոս հարկերից. պետք է անցնել այդ պրոցեդուրաները»,- ասել է Ա. Մովսիսյանը այս տարվա հոկտեմբերի 8-ին լրագրողների հետ ճեպազրույցի ժամանակ:
Մյուս մոլորությունը կապված է «արտահանման հարկ» և «Ռուսաստանի ներքին գին» հասկացությունների հետ: Սերժ Սարգսյանի սեպտեմբերի 3-ի հայտարարությունից հետո ՀՀ էներգետիկայի և բնական պաշարների նախարար Արմեն Մովսիսյանը մեկ անգամ չէ, որ ասել է, թե գազի գինը, այսպես կոչված, «սահմանին» էժանանալու է, քանի որ ռուսական կողմը չի կիրառելու «արտահանման 30 տոկոս հարկը», և մենք գազ ենք գնելու «Ռուսաստանի ներքին գնով` գումարած տրանսպորտային ծախսերը»: ՀՀ նախկին վարչապետ Հրանտ Բագրատյանը շատ ճշգրիտ դիտարկում էր արել` ո՞րն է Ռուսաստանի ներքին գինը գազի համար: «Ո՞րն է ՌԴ ներքին գինը: Օրինակ` Սարատովի «Գազպրոմը» գազը վաճառում է (վերջին գները) բնակչությանը. գազօջախի համար 7.6 հազար ռուբլի 1 խմ-ի դիմաց (227 դոլար), իսկ ջեռուցման համար 4.24 հազար ռուբլի 1 խմ-ի դիմաց (127 դոլար): Ռոստովի մարզում գազը վաճառվում է 125 դոլարով, Մոսկվայում ավելի էժան է: Հայաստանում բնակչությանը վաճառվող գազի գինը 391 դոլար է՝ 3.1 անգամ ավելի թանկ (ի դեպ, մեզ մոտ այն ավելի թանկ է, քան Ուկրաինայում` էլի 3 անգամ)»,- գրել էր ՀՀ նախկին վարչապետը Facebook-ի իր էջում:
Եվ վերջապես` այդպես էլ պարզ չդարձավ` ինչ արժեք է համարվել «ՀայՌուսգազարդում» ՀՀ կառավարության 20% բաժնեմասը ու ինչի դիմաց է այն տրվել: Այնպես որ, շատ հարցեր այդպես էլ անպատասխան են մնում, և հստակ է միայն մի բան` վերջնական սպառողի համար գազի գնի էժանացում չի լինի` անկախ նրանից, թե Հայաստանի ու Ռուսաստանի պաշտոնյաները ինչ են հայտարարում «սահմանի գնի», «սուբսիդավորման» ու «Ռուսաստանի ներքին գնի» մասին:
