Նիկոլ Փաշինյանը մայիսի 10-ին հանրապետության նախագահին է ներկայացրել ոստիկանապետ Վովա Գասպարյանի և ԱԱԾ պետ Գեորգի Կուտոյանի պաշտոնանկության առաջարկը: Խոշոր հաշվով դա անսպասելի չէ, նկատի ունենալով այն խնդիրները, որ ներկայումս ունի Նիկոլ Փաշինյանը: Դա առաջին հերթին բնորոշվում է խորհրդարանում դե յուրե մեծամասնության բացակայությամբ, կամ ընդհանրապես մեծամասնության բացակայությամբ: Այդ պայմաններում Փաշինյանի համար առավել անհրաժեշտ է դառնում գործադիր հնարավորինս կուռ իշխանության ձևավորումը, քանի որ այստեղ բավական մեծ է խորհրդարանում իրավիճակին հակակշռելու խնդիրը: Իսկ ոստիկանությունն ու ԱԱԾ-ն ոլորտներ են, որոնք այդ գործում ունենալու են առանցքային նշանակություն, հաշվի առնելով Հայաստանում ստեղծված արտառոց իրավիճակը: Այդ իմաստով, առաջնային պլան են գալիս ոչ այնքան մասնագիտական կարողության խնդիրները, այլ թիմային պատկանելության և հավատարմության:
Առնվազն այդ կարևոր պաշտոններում, որոնք ապահովելու են ներքին բարդ հարաբերությունների ու բազմաշերտ գործընթացների թերևս տևական փուլում մեծամասնություն չունեցող վարչապետի դիրքերը և օրինականության ու իրավականության հաստատման նրա պարտավորությունների կատարումը: Ավելի շուտ, այստեղ միայն մասնագիտական որակները բավարար չեն և դրանց զուգահեռ գրեթե պարտադիր պայման է թիմային պատկանելությունն ու վստահությունը:
Մյուս կողմից էլ այդ առումով հետաքրքիր է, թե ինչպիսին են լինելու նոր նշանակումները, որովհետև հույժ կարևոր է, որ հանրության համար դրաքնք վստահելի լինեն նաև պրոֆեսիոնալ տեսանկյունից: Ի վերջո, կադրային նշանակումների առումով Նիկոլ Փաշինյանը պատասխանատու է ոչ միայն այսպես ասած իր դիրքի, այլ նաև հանրային վերաբերմունքի և ընկալման մասով:
Ըստ այդմ, նոր նշանակումները լինելու են իսկապես կարևոր ցուցիչներ: Միևնույն ժամանակ, խնդիրը ոչ միայն Փաշինյան վարչապետի, այլ ընդհանրապես Հայաստանում իրավիճակի հանդեպ վստահությունն է, երբ լիովին վերահսկելի կլինի ներքին անվտանգությունը: Դա չափազանց կարևոր խնդիր է, հաշվի առնելով ոչ միայն իշխանափոխության ըստ էության շարունակվող փուլը, այլ նաև միջազգային անվտանգային միջավայրի կատակլիզմները:
