ԱՄՆ-ի օդագնացության և տիեզերական տարածության հետազոտությունների ազգային վարչությունը՝ NASA-ն, ցանկանալով նվազեցնել Ռուսաստանից տիեզերագնացների՝ Միջազգային տիեզերակայան տեղափոխելու կախվածությունը, հայտարարել է Միջազգային տիեզերակայան տիեզերագնացների տեղափոխության ծառայությունների մատակարարման մրցույթ: Այս մասին հայտնում է «Ամերիկայի ձայն»-ը:
NASA-ն հույս ունի, որ մրցույթի արդյունքներով ստեղծված համակարգը թույլ կտա մինչև 2017 թվականը Միացյալ Նահանգներին ազատել տիեզերագնացներ ուղարկելու Ռուսաստանի մենաշնորհից:
Միացյալ Նահանգները 2011 թվականից չունի մարդկանց՝ տիեզերք տեղափոխելու սեփական համակարգ՝ այն բանից հետո, երբ դադարեցվել է «Շաթլ» ծրագիրը՝ վերջինիս բարձր ծախսատարության և այդ տեսակի տիեզերանավերի անվտանգության հետ կապված լուրջ խնդիրների պատճառով:
NASA-ն հույս ունի, որ նոր ծրագիրը հնարավորություն կտա լուծել այս երկու խնդիրները, ինչպես նաև վերականգնել տիեզերագնացներին ԱՄՆ-ի տարածքից տիեզերք ուղարկելու հնարավորությունը:
ԱՄՆ-ի օդագնացության և տիեզերական տարածության հետազոտությունների ազգային վարչությունը ծրագրում է տիեզերագնացների՝ Միջազգային տիեզերակայան առաջին թռիչքը իրականացնել արդեն 2017 թվականին, որը կկատարվի առևտրային հիմունքներով: Այնուհետև նախատեսում է վեց ամիսը մեկ տիեզերակայան ուղարկել չորս մարդուց բաղկացած անձնակազմեր:
NASA-ն պատրաստ է տրամադրել տիեզերագնացներին Միջազգային տիեզերակայան ուղարկելու նախագծերի վերջնական մշակման ֆինանսավորումը, ինչպես նաև օժանդակել տիեզերական տրանսպորտային նոր համակարգի կառուցմանը, փորձարկմանն ու սերտիֆիկացմանը:
