The Washington Post պարբերականը՝ հղում անելով իր աղբյուրներին, հայտնել է այն մասին, որ Սպիտակ տան իրավաբանները մշակում են պաշտպանական ռազմավարություն այն դեպքի համար, եթե ազգային անվտանգության հարցով ԱՄՆ նախագահ Դոնալդ Թրամփի նախկին օգնական Մայքլ Ֆլինը ցուցմունք տա պետության ղեկավարի և նրա մոտ խորհրդականների դեմ։
«Թրամփի իրավաբանների թիմը ծրագրում է ազգային անվտանգության հարցով նախկին օգնական Մայքլ Ֆլինին անվանել սեփական անձի պաշտպանության ձգտող ստախոս, եթե նա մեղադրի նախագահին կամ նրա ավագ խորհրդականներին խախտումներ թույլ տալու մեջ»,-ասվում է հրապարակման մեջ։
Դեկտեմբերի 1-ին Ֆլինը դատարանում ճանաչել էր մեղքը ՀԴԲ-ի հարցաքննության ժամանակ կեղծ ցուցմունք տալու մեջ։ Համաձայն հատուկ դատախազ Ռոբերտ Մյուլերի մեղադրական եզրակցության՝ նախագահի նախկին օգնականը ստել է՝ կապված այն բանի հետ, որ 2016 թվականի ավարտին ԱՄՆ-ում Ռուսաստանի դեսպան Սերգեյ Կիսլյակի հետ զրույցում նա կոչ չի արել ռուսական իշխանություններին չընդունելու միջոցառումներ՝ ի պատասխան ամերիկյան պատժամիջոցների։ Ֆլինը նախկինում ասել էր, որ չի հիշում Կիսլյակի խոսքերն անհապաղ պատասխան քայլեր չանելու ռուսական կողմի համաձայնության մասին։
Համաձայն ամերիկյան օրենքների՝ չլիազորված անձանց արգելվում է զբաղվել երկրի արտաքին քաղաքականությանը վերաբերող հարցերով։ Սակայն Ֆլինը, դատելով նրա խոստովանությունից, Կիսլյակի հետ քննարկել է պատժամիջոցային հարցը։
