«Ակնհայտ է, որ Արևմուտքը Հայաստանին ճախարակով քաշելով տարավ դեպի համաձայնագրի ստորագրում։ Պետք է շնորհակալ լինենք մեր արևմտյան գործընկերներին, այս իրավիճակը պարտադրում է ի կատար ածել համաձայնագրի դրույթները»,- «Առաջին լրատվական»-ի հետ զրույցում ասաց «Ազատ դեմոկրատներ» կուսակցության նախագահ, ԱԺ նախկին պատգամավոր Խաչատուր Քոքոբելյանը։
Միևնույն ժամանակ Քոքոբելյանը նշում է՝ արհեստական կլինի այդ համաձայնագրի շուրջ քաղաքական ուժերի միավորումը. «Դա շատ արհեստական եմ համարում։ Գուցե շատ մարդիկ անկեղծորեն հավատում են կամ ցանկանում են, որ այդպես լինի, բայց ես հավաստիացնում եմ՝ սա հերթական իմիտացիոն գործընթացն է. ես դա ասում եմ ամենայն պատասխանատվությամբ։ Այն թեզը, որ սա կարող է միավորման առիթ հանդիսանալ, խիստ արհեստական է, սա քաղաքական կարևորագույն օրակարգի բացը լրացնելու արհեստական փորձ է։ Եթե իշխանությունն ինչ-որ տեղ կարող է իր ռեսուրսներից ելնելով իրեն թույլ տալ իմիտացիայով զբաղվել, ապա ընդդիմությունն իրեն նման ճոխություն թույլ տալ չի կարող։ Այս քաղաքական դաշտի «տունը քանդում են» հենց իմիտացիոն պրոցեսները»։
Օրերս Ազգային ժողովի «Ելք» խմբակցության ղեկավար Նիկոլ Փաշինյանը հայտարարել էր, որ այս երկրում իրավիճակ չի փոխվի, դիմելով քաղաքացիներին՝ ընդգծել էր, որ ստեղծված իրավիճակն իրենց ընտրության արդյունքն է։ Խաչատուր Քոքոբելյանն անդրադառնալով այս հայտարարությանը՝ ընդգծեց. «Պարզ է, որ 10 հազար դրամները եղել են, բայց ես երբեք այն կարծիքին չեմ եղել, որ հասարակությունը մեղավոր է։ Հայաստանում եթե ճիշտ կողմնորոշվող է եղել, միշտ մեր ժողովուրդն է եղել։ Այնքան տասը հազար դրամները դեր չեն խաղացել, որքան դրա մասին շատ խոսելը։ Ես կարծում եմ, որ Հայաստանում ընտրությունները կեղծվել են՝ գումարը դաշտ է բերվել, որ իմիտացիա ստեղծվի, և ասեն՝ ժողովուրդը գումար վերցրեց, ընտրեց։ Իհարկե, կան շատ մարդիկ, որ 10 հազար դրամ են վերցրել, բայց դա այդ մարդկանց մեղավորությունը չի եղել»։
