Գերմանիայում բուժակին կասկածում են ավելի քան 80 մարդու սպանության մեջ։ Այս մասին հայտնում է France Presse գործակալությունը՝ հղում անելով ոստիկանությանը։
Ավելի վաղ բուժակ Նիլս Հյոգելը դատապարտվել էր երկու հիվանդների սպանության մեղադրանքով, 2015 թվականի փետրվարին նրան դատապարտել էին ցմահ բանտարկության։ Դատապարտյալն անձամբ հայտարարել էր, որ մոտ 90 հիվանդի է սպանել Դելմենհորսթ և Օլդենբուրգ քաղաքների հիվանդանոցների վերակենդանացման բաժանմունքներում՝ տալով նրանց դեղորայքի մահացու չափաբաժին։
«Հետաքննության այս փուլում հատուկ հանձնաժողովը հաստատել է սպանության 84 դեպքերը»,-հայտնել են Օլդենբուրգի ոստիկանությունից։
Առաջին անգամ նրա հանցավոր գործողությունները նկատել էր գործընկերներից մեկը 2005 թվականին։ Այդ ժամանակ հիվանդը ողջ էր մնացել ներարկումից հետո, իսկ բուժակին 7.5 տարով ճաղերի հետևն էին ուղարկել սպանության փորձից հետո։ Այդ դեպքից հետո իշխանություններն արտաշիրմել են մի քանի դի և պարզել դրանցում դեղորայքի հետքերի առկայությունը։
Մարդասպանը խոստովանել էր, որ մահացու ներարկում է արել՝ որպեսզի այնուհետև փորձի վերակենդանացնել հիվանդներին և գործընկերների առջև հանդես գա փրկարարի դերով։
