Մինչև 2050 թվականը ատոմակայանների կողմից էներգիայի արտադրության ծավալն աշխարհում կեռապատկվի, եթե հաջողվի իրականացնել և ներմուծել նոր տեխնոլոգիաներ: Այս մասին ասվում է Ատոմային էներգիայի միջազգային գործակալության զեկույցում: Նշվում է նաև, որ էներգիայի ընդհանուր սպառումը կշարունակի աճել:
Միևնույն ժամանակ, պահպանողական սցենարը նախատեսում է աշխարհում ատոմային էներգիայի արտադրության փոքր աճ՝ փոխանցում է ITAR-TASS-ը:
«Աճի հիմնական կետը կդառնա Ասիան, այդ թվում՝ Չինաստանը և Հարավային Կորեան: Այդ տարածաշրջանում գեներացումը կարող է աճել նույնիսկ 2012-ի 83 ԳՎտ-ից մինչև 2050-ը հասնելով 189-412 ԳՎտի»,- նշվում է փաստաթղթում:
Արևմտյան Եվրոպայում, նույնիսկ լավատեսական սցենարի դեպքում, ԱԷԿ-ի միջոցով էներգիայի արտադրությունը կմեծանա շատ քիչ՝ 114 ԳՎտ-ից հասնելով 137 ԳՎտ-ի:
Այս անգամ մասնագետները մինչև 2030 թվականը նվազեցրել են իրենց ակնկալիքները ոլորտի զարգացման վերաբերյալ: Նրանք նախկինի պես լավատեսական տարբերակում սպասում են ատոմային էներգիայի արտադրության կրկնապատկում, իսկ պահպանողական տարբերակում՝ 17 տոկոսի աճ:
2012-ին աշխարհում բոլոր ԱԷԿ-ներն արտադրել են 373.1 հազար ԳՎտ էներգիա, ինչը կազմում է տարբեր աղբյուրներից ստացված էներգայի 7 տոկոսը: Դարակեսին այդ մասնաբաժինը կնվազի՝ հասնելով 2.2-5.6 տոկոսի:
ԱԷՄԳ-ը նշում է, որ կարճաժամկետ հեռանկարում ոլորտի աճի վրա կազդեն գազի ցածր գները, էներգիայի վերականգնվող աղբյուրների կիրառումը զարգացած տարածաշրջաններում:
Որպես ատոմային ոլորտի սպառալիք՝ վերլուծաբանները տեսնում են թերթաքարից բնական գազի արդյունահանման նոր տեխնոլոգիաները:
