Երեխաների պաշտպանության միջազգային օրվա առթիվ կազմակերպված միջոցառումների շրջանակում Մանկության աշխարհն էր հյուրընկալվել Երևանի կենդանաբանական այգում: Հունիսմեկյան միջոցառումներն այստեղ մեկնարկեցին մայրաքաղաքի արվեստի դպրոցների, նվագախմբերի, վոկալ ստուդիաների ու պարային համույթների սաների համերգային ելույթներով: Ուրախ մեղեդիների ուղեկցությամբ մուլտհերոսները, ծաղրածուներն ու կենդանիների դիմակներով երեխաները այգու այցելուներին հրավիրել են դառնալ օրվա խորհրդով կազմակերպված ուրախ ծրագրերի մասնակիցն ու ականատեսը: Բացօթյա խաղեր, փոքրիկների կավճանկարներ, պատանիների համար նախատեսված բնապահպանական ինտելեկտուալ մրցույթ, որի հաղթողը կպարգևատրվի հեծանվով: Ինտերակտիվ շարժական տիկնիկային թատրոնն ու բազմաթիվ այլ անակնկալներն արտացոլում էին այգում թևածող անհոգ և ուրախ մթնոլորտը:
Հանդիսությունների բացմանը մասնակցել է նաև Երևանի քաղաքապետի տեղակալ Արամ Սուքիասյանը, ով շրջել, զրուցել է երեխաների և ծնողների հետ, շնորհավորել է փոքրիկների տոնն ու լուսանկարվել նրանց հետ:
