«Առաջ» շարժումից Ֆրանսիայի նախագահի թեկնածու Էմանուել Մակրոնը հայտարարել է, որ կպահանջի Լեհաստանի դեմ պատժամիջոցների սահմանում, եթե դառնա պետության ղեկավար։ Այս մասին հայտնում է Reuters գործակալությունը։
Մակրոնի խոսքով՝ Լեհաստանը «խախտում» է Եվրամիության սկզբունքները։
«Երբ ԵՄ իրավունքներն ու արժեքները չեն հարգվում, ես ցանկանում եմ պահանջել պատժամիջոցների սահմանում»,-հայտարարել է քաղաքական գործիչը։
Լեհաստանը ԵՄ-ի հետ կոնֆլիկտի մեջ է մտել մի շարք բարեփոխումներից հետո, որոնք, Բրյուսելի կարծիքով՝ խախտում են ժողովրդավարական հաշվեկշիռը։ Մասնավորապես, Վարշավային քննադատում են փախստականներ ընդունելուց հրաժարվելու համար։
Եվրոպայի հարցերով Մակրոնի խորհրդական Կլեմենտ Բոնը հայտարարել է, որ նախագահի թեկնածուն նաև ցանկանում է Ռուսաստանին, ԱՄՆ-ին և Եվրոպայի այլ երկրներին հասցնել եվրոպական արժեքների «ուժի և հուսալիության» մասին միտքը։
