Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է Արման Ղ.-ի գործի դատական քննությունը:
35-ամյա Արմանը մեղադրվում էր տուժողի առողջությանը միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 1-ին մասով:
Ըստ մեղադրանքի՝ Արմանի խնամքին երեք երեխա կա: Նրա կինը հեռացել է նրանից ու բնակվել է առանձին:
4 տարեկան որդուն իր խնամքին չթողնելու պատճառով Արմանը լարված հարաբերությունների մեջ է եղել կնոջ հետ:
2016 թվականի հունիսի 30-ին նա քաղաքացիական դատավարության կարգով դիմել է դատարան՝ ամուսնալուծության, 3 անչափահաս երեխաների բնակության վայրի որոշման ու կնոջը ծնողական իրավունքներից զրկելու պահանջով:
Երեխաների բնակության վայրի, խնամքի ու կյանքի պայմանների ուսումնասիրության կապակցությամբ խնամակալության ու հոգաբարձության հանձնաժողովի կողմից նշանակվել է նիստ, որին Արմանի կինը չորսամյա որդուն չի տարել:
2016 թվականի հոկտեմբերի 27-ին, ժամը 14-ի սահմաններում հիշյալ նիստի հետ կապված՝ Արման Ղ.-ն քաղաքապետարանի շենքում զայրացել է կնոջ վրա, ձեռքով հարվածել է կնոջ գլխի ձախ հատվածին, դեմքին՝ դիտավորությամբ նրա առողջությանը պատճառելով միջին ծանրության վնաս՝ դեմքի արյունազեղումների, ձախ այտոսկրի և հայմորյան ծոցի առաջնային պատի փակ կոտրվածքների, գլխուղեղի ցնցման ձևով:
Առաջադրված մեղադրանքում Արման Ղ.-ն իրեն մեղավոր է ճանաչել, նրա միջնորդությամբ գործը քննվել է արագացված ընթացակարգով:
Դատարանը հաշվի է առել, որ Արման Ղ.-ի խնամքին երեք անչափահաս երեխաներ կան, որոնցից մեկը փաստացի բնակվում է հոր հետ, տուժող կինը փաստացի բաժանված է Արմանից: Վերջինս ընդունել է տուժողի ներկայացրած քաղհայցի պահանջը՝ 87 հազար դրամի չափով:
Արման Ղ.-ն մեղավոր է ճանաչվել ՀՀ քրեական օրենսգրքի 113 հոդվածի 1-ին մասով, դատապարտվել է 6 ամիս ազատազրկման, նրա նկատմամբ պայմանական դատապարտություն է կիրառվել, ու սահմանվել է 1 տարի փորձաշրջան:
