Հայաստանի գրողների միության նախագահ Լևոն Անանյանն այսօր լրագրողների հետ հանդիպմանն ասաց, թե ինչ հարցերի պատասխան տվեց հուլիսի 27-ին ՀԳՄ 16-րդ արտահերթ համագումարը: Թե ինչու արտահերթ համագումար, Լևոն Անանյանը մեկնաբանեց՝ հասունացել էին մի շարք հարցեր և խնդիրներ, որոնք լուծում էին պահանջում:
Գրողների միության համագումարն իր անհամաձայնությունն է հայտնել ստեղծագործական միությունները ՀԿ-ների կարգավիճակում ամրագրելուն և վերահաստատել իր վճռականությունը՝ պայքարել ստեղծագործական միությունների օրենքի վերականգնման համար: Համագումարը նաև քննարկեց և հաստատեց ՀԳՄ նոր կանոնադրությունը՝ գործելու օրինական դաշտում, միաժամանակ՝ քննարկելու այն նոր դրույթները, որոնք նախատեսվում են ՀՀ Ազգային ժողովի՝ ՀԿ-ների օրենքի աշնանային նախատեսվող փոփոխություններում: Համագումարը նաև դրական գնահատեց և հավանության արժանացրեց գրական գործընթացը կազմակերպելու՝ ՀԳՄ նախագահության և ՀԳՄ նախագահի վարած քաղաքականությունը:
Համագումարում միաձայն չորրորդ անգամ Հայաստանի գրողների միության նախագահ ընտրվեց Լևոն Անանյանը: Խոսելով Միության կատարած աշխատանքներից՝ Լ. Անանյանը նշեց, որ առաջին անգամ համահայկական գրական համաժողով է հրավիրվել, ինչպես նաև օտարագիր հայ գրողների համաժողով, առաջին անգամ վերջապես, երկար ջանքեր գործադրելուց հետո, կարողացել և հրավիրել են պոեզիայի միջազգային փառատոն, հիմնել նոր տպարան, հրատարակչություն: Առաջին անգամ գիրք նվիրելու օր հայտարարվեց փետրվարի 19-ը՝ Թումանյանի ծննդյան օրը, սահմանվեց «Կանթեղ» մրցականը և այլն:
Մի՞թե ուրիշ որևէ մեկը չկար հինգ հարյուր անդամներից, որ արդեն չորրորդ անգամ Լևոն Անանյանն է ընտրվում: Պարզվում է՝ ՀԳՄ նախագահը ոչ մեկին չի համոզել. «Եթե դուք ինձնից հոգնել եք, ես էլ այնքան եմ հոգնել ձեզնից. խայտառակ, մաղձի, թույնի մթնոլորտ է»,- ասաց Լ. Անանյանը լրագրողներին՝ հարց տալով, թե ինչպես է ներկայացվում ճշմարտության հակառակ կողմը:
Լ. Անանյանի խոսքով՝ 500-ից 70-ը չեն մասնակցել նիստին, ինչը շատ նորմալ է: Նա նշեց իր կատարած աշխատանքները, թե ինչ են արել այս տարիների ընթացքում: Այնուհետև ընդգծեց, որ Միությունը իրենից հետո սոդոմ-գոմորի կվերածվի, քանի դեռ Աբգար Ափինյանը կա:
Լ. Անանյանը նշեց նաև, որ Գրողների միությունից հանրությունը ավելին է սպասում, որ այս կամ այն խնդրի վերաբերյալ կարծիք հայտնի, դատապարտի, սակայն Գրողների միությունը հինգ հարյուր հոգանոց մի կառույց է. «Պատկերացնո՞ւմ եք, Գրողների միությունը դատապարտի որևէ ակցիա, միասնական կարծիք ասի, մեր գրողները, Լևոն Խեչոյանը, մյուս տաղանդավոր գրողները իրենց անհատական կարծիքներն ասում են, ինչպե՞ս կարող եմ բոլորի անունից դատապարտեմ ուղեվարձի թանկացումը»,- ասաց նա՝ հավելելով, որ անհատական կարծիք կարելի է արտահայտել, բայց ոչ Միության անունից:
Անդրադառնալով վերջին շրջանում քաղաքացիական ակտիվությանը՝ նա նշեց, որ թեև ինքը թերահավատ էր, որ մեր երկրում քաղաքացիական հասարակության նմուշներ կլինեին, բայց այն, ինչ տեղի ունեցավ, ինքնաբուխ էր և ոչ պատվիրված, ոչ թե թելադրանքի տակ, ոչ թե քաղաքական շահի դիտանկյունից, այլ զուլալ դրսևորում, որի հետ, բարեբախտաբար, հաշվի նստեց կառավարությունը:
