Թուրքական Son dakika լրատվական կայքի փոխանցմամբ՝ հոկտեմբերի 27-ը դարձավ «սև հինգշաբթի». միանգամից մի քանի նահանգներից լուրեր են ստացվել «Քրդստանի աշխատավորական» կուսակցության (PKK) դեմ պայքարում անվտանգության ուժերի ներկայացուցիչների զոհվելու մասին։
Քուրդ զինյալները Դիարբեքիրի նահանգի Հանի շրջանում պայթուցիկ են տեղադրել ճանապարհին, որի պայթյունի հետևանքով զոհվել է 2 զինծառայող։ Վիրավորվել է ևս 2 զինծառայող։
Բաթմանի նահանգում գրանցված բախման ժամանակ զոհվել է 1 գյուղական պահապան (քուրդ վարձկան)։ Հաքքարի նահանգի Չուքուրջա շրջանում PKK-ի զինյալների հասցրած ականանետային հարվածի հետևանքով սպանվել է 1 զինծառայող։
Բացի այդ, նույն շրջանում ականի պայթյունի հետևանքով ծանր վիրավորվել է 1 զինծառայող։ Բինգյոլի նահանգի Քիղի շրջանում քուրդ զինյալների իրականացրած պայթյունի ժամանակ սպանվել է 1 զինծառայող։
Սիիրթ նահանգի Քուրթալան շրջանում էլ կայծակի հարվածի հետևանքով զոհվել է 1 և վիրավորվել ևս 1 զինծառայող։ Ընդհանուր առմամբ, «սև հինգշաբթիի» ժամանակ զոհվել է 6 զինծառայող ու գյուղական պահապան։
