Եգիպտոսի բանակը զրահատեխնիկա է տեղակայել Գազայի հատվածի հետ սահմանին, որը վերջին տասնամյակներին պահպանել են թեթև հրազենով զինված փոքրաթիվ ոստիկանները: Այս մասին RIA Novosti-ին հայտնել են պաղեստինյան անկլավի բնակիչների շարքում եղած ականատեսները:
Գործակալության զրուցակիցներից մեկը հայտնել է, որ սահմանային գոտում կա մոտ 30 տանկ: Միաժամանակ եգիպտական իշխանություններն ակտիվացրել են պայքարը մաքսանենգների և նրանց ստորգետնյա թունելների դեմ, որոնք կիրառվում են պաղեստինա-եգիպտական սահմանի տակով բեռների ու մարդկանց, այդ թվում՝ գրոհայինների ու զենքի անօրինական տեղափոխման համար:
«Եգիպտական կողմում բնակվող եգիպտացի հարազատներից իմանում ենք, որ սահմանապահները ոչնչացնում են կամ վերահսկողության տակ են վերցնում շատ թունելներ»,- ասել է իրավիճակին իրազեկ աղբյուրը:
Սինայի թերակղզում, որտեղով անցնում են Իսրայելի և Գազայի հատվածի հետ Եգիպտոսի սահմանները, եգիպտական ուժերի ներկայությունը կարգավորվում է 1979 թվականին կնքված Քեմփ-Դևիդի խաղաղության պայմանագրով: Հավելյալ ուժերի մուտքն ապառազմականացված գոտի պահանջում է Իսրայելի ղեկավարության համաձայնությունը:
Իսրայելը պաշտոնապես չի մեկնաբանել տանկերի տեղակայման հաղորդագրությունը: Իսրայելական հեռուստատեսության 9-րդ ալիքը, մեջբերելով զինվորական շրջանակների աղբյուրին, հայտնել է, որ Եգիպտոսը գործում է իսրայելցի գործընկերների համաձայնությամբ:
