Այսօր Հայաստան-ԵՄ Ասոցացման համաձայնագրի շուրջ քննարկմանը Տարածաշրջանային հետազոտությունների կենտրոնի տնօրեն Ռիչարդ Կիրակոսյանը, խոսելով համաձայնագրի կարևորությունից, նախ առանձնացրեց համաձայնագրի հնարավորությունների տրամաչափը: Նրա խոսքով՝ այս համաձայնագրով Հայաստանը հնարավորություն է ստանում օգտվել նոր ռազմավարական հնարավորություններից:
Նա առանձնացրեց չորս հնարավորություններ. առաջին՝ սա հնարավորություն է ԵՄ-ի համար, այսինքն՝ այս համաձայնագիրը Եվրամիության համար լծակ կստեղծի՝ ՀՀ-ում իրականացնելու իրական բարեփոխումներ: Երկրորդ՝ սա Հայաստանին ինտեգրման ավելի լայն հնարավորություն է տալիս՝ մեկուսացման պայմաններում: Երրորդ՝ տարածաշրջանում առաջարկում է ավելի մեծ կայունություն:
Նա նշեց, որ չորրորդ հնարավորությունը Ռուսաստանի համար է, և այս ենթատեքստում ավելի ժողովրդավար և առաջադեմ Հայաստանը բխում է ՌԴ-ի շահերից: Նա նշեց նաև դրա սպառնալիքները: Առաջին սպառնալիքը, Ռիչարդ Կիրակոսյանի խոսքով, Եվրամիության համար է, և Հայաստանի Ասոցացման պայմանագրի առումով Եվրամիությունը ավելին պետք է անի, քանի որ այդ գործընթացը բարձրացնում է Եվրամիությունից սպասվող ակնկալիքները: Սակայն Հայաստանում ժողովրդավարության ճանապարհին թերությունները չպետք է հանդուրժվեն:
Բացի այդ, սպառնալիքը Հայաստանի համար ոչ թե համաձայնագիրը ստորագրելու, այլ այն իրականացնելու մեջ է: Հայաստանի համար սպառնալիքն այն է, որ բարեփոխումները պետք է խորանան և արագանան: Հաջորդը՝ սպառնալիք է հայ օլիգարխների նկատմամբ, օլիգարխիական տնտեսության բաժանումը իրոք մեծ վտանգ է ներկայացնում Հայաստանի համար:
Չորրորդ սպառնալիքը, ըստ Ռիչարդ Կիրակոսյանի, սպառնալիք է՝ ուղղված ՌԴ-ին: Պարզ ձևակերպմամբ՝ Ռուսաստանը Հայաստանին պետք է վերաբերվի որպես հավասարը հավասարի:
«Հայ-ռուսական հարաբերությունները եղել են շատ կարևոր և միշտ կմնան այդպիսին, սակայն այստեղ խնդիրն այն է, որ այդ հարաբերությունների մեջ բացակայում է հավասարակշռությունը: ՀՀ-ն ՌԴ-ի միակ վստահելի գործընկերն է այս տարածաշրջանում և ավելի մեծ ռազմավարական նշանակություն ունի ՌԴ-ի համար, քան ինքն է կարծում»,- ասաց նա:
Ռիչարդ Կիրակոսյանը նաև հավելեց, որ ազգային անվտանգության համար ամենակարևոր սպառնալիքը ներքին բնույթի է, և Եվրամիության Ասոցացման համաձայնագիրը իրենից շատ մեծ հնարավորություն է ներկայացնում Հայաստանի համար:
«Սա մի հնարավորություն է, որ Հայաստանը պարզապես չի կարող իրեն թույլ տալ բաց թողնել»,- եզրափակեց Ռ. Կիրակոսյանը:
