Ադրբեջանական զինուժի դիվերսիոն անհաջող փորձի արդյունքում հակառակորդը հետ է շպրտվել` մարտադաշտում թողնելով Ադրբեջանի ԶՈւ կապիտանի դին: Լեռնային Ղարաբաղի Հանրապետության պաշտպանության նախարարությունը հրապարակել է անհերքելի փաստեր, որոնք վկայում են, որ մարտադաշտում մնացել է 1979թ. ծնված Վագիֆ Դիլգամ օղլու Բայրամովի դին:
«Ապրիլի 6-ի լույս 7-ի գիշերը ղարաբաղա-ադրբեջանական հակամարտ զորքերի շփման գծի հյուսիսարևելյան (Թալիշի) ուղղությամբ հակառակորդը ձեռնարկել է դիվերսիոն հետախուզական գործողություն: ՊԲ առաջապահ ստորաբաժանումները ժամանակին հավաստանշելով թշնամական խմբի առաջխաղացումը` անցել են կազմակերպված պաշտպանության:
Ծավալված մերձամարտի արդյունքում, հակառակորդը մարտադաշտում թողնելով Ադրբեջանի ԶՈւ կապիտան, Նավթալան քաղաքի բնակիչ, 1979թ. ծնված Վագիֆ Դիլգամ օղլու Բայրամովի դիակը` հետ է շպրտվել:
Կատարվածը հերթական անգամ փաստում է, որ ադրբեջանական կողմը ոչ միայն չի հարգում նախօրյակին ձեռքբերված կրակի դադարեցման մասին պայմանավորվածությունը, այլև սադրիչ քայլերով փորձում է նպատակաուղղված կերպով ապակայունացնել առանց այն էլ պայթունավտանգ իրավիճակը»,- ասված է ԼՂՀ ՊԲ մամուլի ծառայության տարածած հաղորդագրության մեջ:
