Նոր Օռլեանի (Լուիզիանա նահանգ) ոստիկանությունը պարզել է երիտասարդի ինքնությունը, որը կիրակի կրակ էր բացել Մայրերի օրվա առիթով քաղաքում անցկացված շքերթի մասնակիցների վրա: Այս մասին հայտնել է քաղաքի ոստիկանապետ Ռոնալ Սերպասը՝ փոխանցում է RIA Novosti-ն:
Նրա խոսքով՝ իրավապահ մարմինները փնտրում են 19-ամյա Ակեյն Սքոթին:
«Մենք Ձեր մասին գիտենք ավելին, քան Ձեզ թվում է: Խորհուրդ եմ տալիս հանձնվել ոստիկանությանը»,-հայտարարել է Սերպասը՝ մամլո ասուլիսի ժամանակ ԶԼՄ-ների միջոցով կոչ ուղղելով կասկածյալին:
Հիշեցնենք, որ միջադեպի հետևանքով տուժել էր 19 մարդ: Վնասվածքների մեծ մասը թեթև են:
Ավելի վաղ ոստիկանության ներկայացուցիչները հայտնել էին, որ հրաձգությանը կարող է մասնակից լինել 3 մարդ: Տվյալները ստուգվում են: Տեղեկության համար, որի միջոցով հնարավոր կլինի գտնել և ձերբակալել մեղավորին կամ մեղավորներին, հայտարարվել է 10 հազար դոլարի չափով պարգևավճար:
