The Telegraph պարբերականի փոխանցմամբ՝ Լիբիայի նախկին առաջնորդ Մուամմար Քադաֆին Մեծ Բրիտանիայի նախկին վարչապետ Թոնի Բլերին զգուշացրել է Եվրոպայի համար իսլամական ծայրահեղականության սպառնալիքի մասին։
Դա հայտնի է դարձել երկու քաղաքական գործիչների միջև տեղի ունեցած հեռախոսազրույցների գաղտնազերծումից հետո, որոնց այսօր հրապարակել է Մեծ Բրիտանիայի խորհրդարանի՝ արտաքին հարցերով հանձնաժողովը։
Դրանց համաձայն՝ Քադաֆին դեռևս 2011 թվականի փետրվարի 25-ին, երբ Լիբիայում արդեն իսկ սկսվել էին անկարգությունները, Բլերին բացատրել է, որ ձգտում է երկիրը պաշտպանել «Ալ-Քաիդայի» զինյալներից:
«Մենք չենք հարձակվում նրանց վրա, այդ նրանք են հարձակվում մեզ վրա։ Ես ցանկանում եմ ձեզ հայտնել ճշմարտությունը։ Այս իրավիճակն այնքան էլ խճճված չէ, ամեն ինչ պարզ է. Հյուսիսային Աֆրիկայում հայտնվել են «Ալ-Քաիդայի» քնած մասնաճյուղեր։ Լիբիայի քնած մասնաճյուղերը նման են նրանց, որոնք Ամերիկայում եղել են սեպտեմբերի 11-ի նախօրեին։
Նրանք (ջիհադականները) զենք են ձեռք բերել և ամենուրեք սարսափեցնում են մարդկանց։ Մարդիկ չեն կարողանում դուրս գալ տներից։ Սակայն իրական պատկերը չեն պատկերացնում, այստեղ չկան օտար թղթակիցներ։ Մենք համաշխարհային բոլոր լրագրողներին խնդրել ենք գալ և տեսնել ճշմարտությունը։ Նրանք զինված բանդաներ են։ Նրանց հետ անհնար է պայմանավորվել։
Նրանք ցանկանում են վերահսկել Միջերկրական ծովը և հետո կհարձակվեն Եվրոպայի վրա»։ Բլերն իր հերթին հայտարարել է խաղաղ կարգավորման անհրաժեշտության մասին։
Պարբերականն ընդգծում է, որ այդ խոսակցությունից երեք շաբաթ անց արևմտյան երկրների դաշինքը՝ ներառյալ Մեծ Բրիտանիան, սկսեցին ավիահարվածներ հասցնել Լիբիային, ինչը հանգեցրեց Մուամմար Քադաֆիի գահընկեցությանը։ Պարբերականը նաև նշում է, որ Թոնի Բլերը երկու անգամ զանգահարել է Քադաֆիին՝ փորձելով նրան համոզել, որպեսզի լքի երկիրը։
Հոդվածում նշված է, որ Քադաֆիի զգուշացումը կարծես հաստատվեց, նրա գահընկեցությունից հետո Լիբիան կրախ է ապրել և նախկինի նման բռնկված է քաղաքացիական պատերազմի բոցով։ ԴԱԻՇ-ի հետ կապված իսլամական ծայրահեղականները զգալի տարածքներ են վերահսկում Լիբիայում։ ԴԱԻՇ-ի ուղարկած ահաբեկիչները նոյեմբերին ահաբեկչություններ իրականացրին Փարիզում։
Արտաքին հարցերով հանձնաժողովի նախագահ Կրիսպին Բլանտը հայտարարել է, որ հանձնաժողովը Լիբիայի դեպքերի հետաքննման շրջանակներում դիտարկելու է Քադաֆիի «մարգարեական զգուշացումը»։
Նրա խոսքերով՝ ներկա պահին առկա տեղեկությունները վկայում են, որ արևմտյան քաղաքական գործիչները ինչպես Լիբիայի ժողովրդի, այնպես էլ Արևմուտքի շահերի համար միջամտության ռիսկերի հարցում եղել են ավելի պակաս խորաթափանց, քան Քադաֆին։
