«Ի պաշտպանություն Վոլոդյա Ավետիսյանի» հանձնախմբի անդամները և մի խումբ ազատամարտիկներ ակցիա էին իրականացնում «Վարդաշեն» ՔԿՀ-ի դիմաց: Նրանք անազատության մեջ գտնվող իրենց մարտական ընկեր, պաշտոնաթող գնդապետ Վոլոդյա Ավետիսյանին և հացադուլի մեջ գտնվող մյուս կալանավորներին՝ Փայլակ Խաչատրյանին, Գեղամ Ասատրյանին, Հովսեփ Պոտրոսյանին, հորդորում էին դադարեցնել հացադուլը:
«Ի պաշտպանություն Վոլոդյա Ավետիսյանի» հանձնախմբի ղեկավար Գագիկ Սարուխանյանի խոսքով՝ Վոլոդյա Ավետիսյանի առողջությանը արդեն իսկ կարող է վտանգ սպառնալ. «11 օր է՝ հացադուլի մեջ է: Նրա կյանքը թանկ է, և նրա կյանքը միայն իրեն չի պատկանում, այլ ժողովրդին, հետևաբար հարկ չկա հացադուլով կյանքը վտանգելու»:
Նրա խոսքով՝ դեռ ամիսներ առաջ դիմում է ներկայացվել Վոլոդյա Ավետիսյանին վաղաժամկետ ազատ արձակելու մասին, բայց նման որոշում կայացնող՝ վաղաժամ ազատման անկախ հանձնաժողովի անհայտ անդամները 3 րոպեով զրույց են ունեցել Վոլոդյա Ավետիսյանի հետ և անհայտ պատճառներով մերժել: «Մենք՝ ազատամարտիկներս, ինչպես նաև բազմաթիվ քաղաքացիներ, համարում ենք, որ հացադուլի հետ կապված՝ Վոլոդյա Ավետիսյանի քայլը լույս սփռեց վաղաժամ ազատման անկախ հանձնաժողովի անօրինական գործունեության վրա, ինչով հացադուլը ծառայեց իր նպատակին»,- նշեց Գագիկ Սարուխանյանը՝ հավելելով, որ այն, որ արդարադատության նախարար Արփինե Հովհաննիսյանը ասել է, որ հանձնաժողվի հետ կապված խնդիրներ կան, և հարկ կա, որ ԱԺ օրենսդրական նախաձեռնություն ներկայացնի, արդեն իսկ մասամբ հաղթանակ է:
Գագիկ Սարուխանյանը ցանկանում էր մտնել ՔԿՀ՝ տեսնել հացադուլավորներին, բայց ՔԿՀ-ի աշխատակիցներն ասացին, որ չի կարող, կարող է նամակ-հորդորը փոխանցել:
Մանրամասները՝ տեսանյութում:
