«Հայաստանի անկախության գլխին կախված սպառնալիքներն ու արհավիրքները շատ են, շատ իրադարձություններ են եղել՝ ցավալի և ողբերգական, դրանք, գումարվելով իրար, վտանգում են Հայաստանի ինքնիշխանությունը»,- «Առաջին լրատվական»-ի հետ զրույցում նշեց Մամուլի ազգային ակումբի ղեկավար Նարինե Մկրտչյանը՝ անդրադառնալով Հոկտեմբերի 27-ի ոճրագործությանը:
Նարինե Մկրտչյանը նշեց, որ իր համար նոր Սահմանադրությունը և կառավարման համակարգի փոփոխությունն անընդունելի են: «Այստեղ մի քանի գործոններ կարող են դեր խաղալ:
1. Բոլորի համար հստակ է, որ իշխանությունը հանրաքվեի ժամանակ գործի է դնելու իր արատավոր, վատթարագույն ավանդները՝ կեղծելու հանրաքվեն:
2. Ցավալի է, որ հայաստանյան արատավոր իշխանական համակարգի դեմ հակազդող ընդդիմադիր կառույց չկա: Անհատների, կուսակցությունների միավորումը շատ թույլ է հակազդելու համար, այստեղ հասարակությունը պիտի ասեր իր խոսքը: Անընդհատ պարտության են տարել հասարակությանը և այդ պարտությունը անհետևանք չի անցնում, հասարակական խոր հուսախաբություն է առաջանում, և դժվար է նորից արթնացնելը, բողոքի կոչ անելը:
Հայաստանի ընդդիմադիր դաշտը հրկիզված վիճակում է, և նրանք, ովքեր հավակնում են ընդդիմադիր կոչվելուն, բնավ չեն արձագանքում մեր երկրի մարտահրավերներին: Ինձ համար ջրբաժանն անցնում է Հայաստանի հանրապետության ԵՏՄ անդամակցությամբ: Եթե ընդդիմությունը քվեարկում է այնպես, ինչպես իշխանության թևը, այսինքն՝ չունեն արտաքին քաղաքական հակասություններ, ուրեմն եթե իրենք լինեին իշխանության, ապա նույնպես Հայաստանը պիտի տանեին այս ճանապարհով:
Պետք է լրջորեն մտածել, հանրային բանավեճ հրահրել և հասկանալ՝ որն է մեր երկրում փոփոխության հույսը, ովքեր կարող են բերել այդ փոփոխության հույսը»:
