Այո՛, օրօրուեցանք նախագահական թեկնածուի խոստումով: Հաւատացինք, որ այս թեկնածուն տարբեր պիտի ըլլայ. վերջի ի վերջոյ, ան Ուաշինկթընեան վարքն ու բարքը հիմնովին փոխելու ծրագիրով նետուած էր ընտրապայքարին, ու ամբողջ երկրի տարածքով միլիոնաւոր մարդիկ, երիտասարդներ, իրաւազրկուածներ, փոքրամասնութիւններ, հաւատացին իրեն:
Մեզի ալ՝ ամերիկահայերուս, Օպամա խոստացաւ Հայկական Ցեղասպանութիւնը ճանչնալ, 1915ի Մեծ Աղէտը, Մեծ Եղեռնը բնութագրել իր քաղաքական նշանակութիւնը արտայայտող ձեւակերպումով՝ իբրեւ հայ ժողովուրդին դէմ գործուած ցեղասպանութիւն:
Հաւատացինք ու սպասեցինք: Խաբուեցանք: Դարձեալ ու դարձեալ խաբուեցանք:
Պէտք է ընդունիլ, հաւանաբար, որ այս նախագահին այնքա՛ն դիւրին չէր դրժել իր խոստումը: Այլապէս, ինքզինք չէր նետեր հայ-թրքական Արձանագրութիւններու ձախաւեր նախաձեռնութեան ետին, որ իրեն հնարաւորութիւն պիտի տար առանց թուրք ուրացողները նեղացնելու՝ հայերն ալ օրօրել բացուող ճանապարհներու բարիքներով:
Հայ-թրքական երկամեայ ձախողած քաղաքականութեամբ, սեփական խօսքը դրժած ըլլալու տխուր գիտակցութեամբ, ահա նախագահ Օպամա, Հայկական Ցեղասպանութեան տարելիցէն քանի մը օր առաջ, Ապրիլ 21ին կու գայ մեր մօտ, Լոս Անճելըս, կու գայ հայութեամբ տրոփուն այս աւանը, կու գայ այնպիսի պահու մը, երբ մենք կը պատրաստուինք ոգեկոչելու մեր միլիոն ու կէս նահատակներուն յիշատակը, կու գայ որպէսզի իր յաջորդ շրջանին պաշտօնավարութիւնը ապահովէ, կու գայ, որ նոր խոստումներ տայ իր քուէարկողներուն, իրեն զօրակցողներուն, որպէսզի դարձեալ այդ խոստումները… դրժէ:
Մենք չենք կրնար անտարբեր մնալ նախագահ Օպամայի այս այցելութեան հանդէպ: Մենք չենք կրնար այս առիթը չօգտագործել՝ մեր ընդվզումն ու ցասումը չարտայայտելու, մեր բողոքը չփոխանցելու ուղղակի իրեն՝ նախագահին, որպէսզի ան անդրադառնայ, թէ իր խոստմնադրժութեամբ կորսնցուցած է տասնեակ հազարաւոր ամերիկահայ քուէարկողներու նեցուկը, եւ թէ ան, շարունակելով ուրացողներու պահանջներուն տուրք տալու քաղաքականութիւնը՝ հաստատապէս պիտի կորսնցնէ մեր համակրանքը՝ մեր քուէն:
Մենք չենք կրնար այս առիթը փախցնել նաեւ այն պարզ հաշուարկով, որ մեր բողոքի ձայնը լսելի դարձնելէ ետք, երեք օրէն կրնանք իմանալ, թէ կրցա՞նք արդեօք որեւէ ձեւով փոխել նախագահ Օպամայի անցեալ երկու տարիներու վարքագիծը ու զայն վերադարձնել ճշմարտութեան ճամբուն: Նման յոյս կրնանք ունենալ, անշուշտ, եթէ մեր ձայնը բարձր է, եթէ մեր ձայնը հզօր է, եթէ մեր ձայնը ուժգնօրէն կը բարձրանայ հազարաւոր հայորդիներու կոկորդներէն:
Ուրեմն, եկէ՛ք ձեռք ձեռքի տանք, եկէ՛ք միասին աշխատինք, որ Հինգշաբթի օր, Ապրիլ 21ին, կէսօրէ ետք ժամը 3ին, հազարաւորներով լեցնենք 10202 W. Washington Blvd, Culver City հասցէին գտնուող «Սոնի Սթիւտիօ»ի շէնքին շրջափակը, եւ մեր պատգամը ամէնէն համոզիչ ձեւով փոխանցենք նախագահ Օպամային ու իր խորհրդատուներուն:
Գործի օր է. կրնանք այդ օր քիչ մը կանուխ դուրս գալ գործէն, որուն դիմաց ալ կրնանք մէկ այլ օր երկար աշխատիլ:
Դպրոցի ժամ է: Եթէ գարնանային արձակուրդի օր է, արդէն՝ հրաշալի, բայց եթէ քննութեան պահ մը չէ, որ պիտի փախցնէք, սիրելի աշակերտներ ու ուսանողներ, միացէք մեզի, քաղաքացիական պարտքի ու պարտաւորութեան հրաշալի դասընթացքի մը մասնակցելու:
Տարեց էք, միջոց չունիք ցոյցի վայր հասնելու: Կապուեցէք հայ կեդրոններ, հայկական եկեղեցիներ, ձեր բարեկամներուն, ձեր զաւակներուն, դրացիներուն, անպայման գտէք ձեւը տեղ հասնելու: Թող ձեր տագնապը զարթնեցնէ անտարբերները ու զանոնք մղէ շարժելու իրենց տեղէն ու ձեզի հետ միասին ձայնակցելու մեզի:
Յառաջիկայ օրերուն, կը խնդրենք, որ բոլոր անոնք, որոնք իրենք զիրենք Հայ Դատի զինուորեալներ կը սեպեն, իրենց շրջապատին մէջ քարոզչութիւն տանին, յանձնառութիւններ ստանան մասնակցողներէ: Պէ՛տք է կարենանք տպաւորիչ թիւով դուրս գալ նախագահ Օպամային առջեւ, որպէսզի ան գիտնայ նաեւ, թէ մեր ետին ամբողջ ամերիկահայութիւնն է, որուն քուէն է կիշռի վրայ:
