«Այս պահին, եթե Զարուհի Փոստանջյանին իրական վտանգ սպառնա, մեր կառույցը առաջինը կլինի նրա կողքին,- «Առաջին լրատվական»-ի հետ զրույցում, անդրադառնալով Զարուհի Փոստանջյանի ելույթին և նրան ուղղված ԱԱԾ հայտարարությանը, հավաստիացրեց ՄԻՊ Կարեն Անդրեասյանը:
Մարդու իրավունքների պաշտպանը նաև նշեց. «Զարուհի Փոստանջյանի ելույթը որևէ իրական վտանգ չի ստեղծել սահմանադրական կարգի տապալման համար, հետևաբար անհանգստանալու և նրա նկատմամբ որևէ իրավական գործընթաց սկսելու կարիք չկա: Միևնույն ժամանակ, ԱԱԾ հայտարարությունը որևէ վտանգ չի ստեղծել տիկին Փոստանջյանի համար: ԱԱԾ հայտարարությունը իրական վտանգ, սպառնալիք այս պահին չի պարունակում, իրենք իրավունք ունեն մասնակցելու հանրային բանավեճի:
Եթե որևէ իրավական կամ այլ գործընթաց սկսվի Զարուհի Փոստանջյանի նկատմամբ, այն մասով, որ նա, թերևս մի քիչ սադրիչ, մի քիչ գրգռող հայտարարություններ է արել, և դա ընկալվի որպես սահմանադրական կարգի տապալում, ապա դա կլինի սահմանադրության և իրավունքի կոպիտ խախտում»:
