Ծնունդով Կատարից Ֆաթիմա Ալ-Անսարին, որը ենթարկվել էր 5 օրգանների փոխպատվաստման, փետրվարի 26-ին աղջիկ է ունեցել: Ինչպես հայտնում են Մայամիի (Ֆլորիդա նահանգ) կլինիկայի բժիշկները, որտեղ լույս աշխարհ է եկել երեխան, դա առաջին նման դեպքն է աշխարհում:
«Մենք նայել ենք շատ բժշկական գրականություն, սական, ըստ մեր տեղեկությունների, ներկայիս դեպքը աշխարհում առաջինն է, երբ երեխա է ունեցել 5 փոխպատվաստված օրգաններով կինը»,- հայտարարել է հիվանդանոցի ներկայացուցիչը մամլո ասուլիսին:
Բժիշկները ընդգծել են, որ իրենց հայտնի է Եվրոպայում միայն 2 փոխպատվաստված օրգանով կնոջ՝ երեխաներ ունենալու փաստեր:
Երբ Ալ-Անսարին 19 տարեկան է եղել, նրա մոտ հայտնաբերվել է աղիքային զարկերակի տրոմբ: 2007 թ. նրան Մայամիի հիվանդանոցներից մեկում վիրահատել էին, ինչի արդյունքում նա ստացել էր դոնորական լյարդ, հաստ ու բարակ աղի, ստամոքս, ենթաստամոքսային գեղձ:
Կինը երեխային ունեցել է կեսարյան հատմամբ:
Բժիշկները վստահ են, որ 26-ամյա կինը կկարողանա էլի երեխաներ ունենալ:
