ԱՄՆ-ում ապրող կանանց ավելի քան 60%-ը և տղամարդկանց 75%-ն այսօր տառապում է ճարպակալությամբ կամ ավելորդ քաշից: Սա զգալիորեն շատ է նախորդ տասնամյակների տվյալներից, գրում են բժիշկները JAMA Internal Medicine ամսագրում հրապարակված հոդվածում:
«Ճարպակալումն ու ավելորդ քաշը կապված են առողջական շատ քրոնիկ խնդիրների, այդ թվում՝ գերճնշման, սրտի հիվանդությունների, երկրորդ տիպի դիաբետի, օստեոարտրիտի և քաղցկեղի որոշ տեսակների հետ: Մենք պետք է կոորդինացված ջանքեր գործադրենք այդ միտումը դադարեցնելու համար, որը կրճատում է այդքան շատ մարդկանց կյանքը»,- ասել է Լին Յանը Սենթ Լուիսում Վաշինգտոնի համալսարանից, որի խոսքերը մեջբերում է Live Science պարբերականը:
Յանն ու նրա գործընկերները այսպիսի եզրակացության են եկել՝ ուսումնասիրելով 2007-2012 թթ. NHANES նախագծի շրջանակներում ազգային առողջապահական և սոցիալական ծառայությունների ստացած վիճակագրությունը: Դրան մասնակցել է տարբեր ազգերի և ռասաների ավելի քան 15 000 ամերիկացի՝ կրթության և տնտեսական ապահովվածության տարբեր մակարդակով:
NHANES-ի տվյալների վերլուծությունը ցույց է տվել, որ ամերիկացիների մոտ 40%-ը, ամերիկուհիների մոտ 30%-ը տառապում է ավելորդ քաշից, տղամարդկանց ևս 35%-ը և կանանց 37%-ը տառապում է ճարպակալմամբ:
Պարզվել է՝ ավելորդ քաշից ամենաքիչը տառապում են անգլո-սաքսոնական ծագմամբ կանայք, մինչդեռ աֆրոամերիկուհիներին բնորոշ է եղել ճարպակալության առավելագույն տարածվածությունը:
Տղամարդկանց դեպքում հակառակն է եղել՝ աֆրոամերիկացիներն ամենաքիչն են տառապել ավելորդ քաշից, մինչդեռ անգլո-սաքսերն ու իսպանա-ամերիկացիներն ամենից հաճախ են ավելորդ քաշ ունեցել:
