«Ոստիկանությունը իր գործողություններով խախտել է Եվրոպական կոնվենցիայի 11-րդ հոդվածը, որովհետև միջամտություն է իրականացրել հավաքի ազատությանը, որը սահմանված է կոնվենցիայի 11-րդ հոդվածով։ Այդ միջամտությունը եղել է ոչ օրինական, ոչ համաչափ և ոչ իրավական»,- «Առաջին լրատվական»-ի հետ զրույցում ասաց փաստաբան, Եվրոպական դատարանում բազմաթիվ գործեր շահած Լուսինե Սահակյանը՝ անդրադառնալով վաղ առավոտյան Բաղրամյան պողոտայի սկզբնամասում էլեկտրաէներգիայի թանկացման դեմ բողոքի նստացույց կազմակերպած ակտիվիստների նկատմամբ ոստիկանության կիրառած բռնություններին:
Փաստաբանի խոսքով՝ ցանկացած ինքնաբուխ հավաք թույլտվություն չի պահանջում, հետևաբար անձանց ներկայացված ոստիկանական պահանջները եղել են անօրինական:
Սահակյանն ընդգծեց, որ ոստիկանները իրենց գործողություններով միանշանակ խոչընդոտել են լրագրողների աշխատանքին, մասնագիտական գործունեությանը, և պետք է հետևողական լինել, որ այդ անձինք պատասխանատվության ենթարկվեն:
Փաստաբանի խոսքով՝ միայն լրատվամիջոցներով տարածված հրապարակումները արդեն իսկ հիմք են՝ ոստիկանների նկատմամբ քրեական գործեր հարուցելու և նրանց պատասխանատվության ենթարկելու համար:
Հիշեցնենք, որ ընդդեմ էլեկտրաէներգիայի թանկացման կազմակերպված նստացույցը, որը երեկ երեկոյան տեղափոխվել էր Բաղրամյան պողոտայի սկզբնամաս, ցրվեց ոստիկանական բռնի գործողությունների ու ջրցան մեքենաների արդյունքում: Վաղ առավոտից ոստիկանական տարբեր բաժանմունքներ բերման են ենթարկվել 237 ակտիվիստներ: Տարբեր քաղաքացիներ դիմել են հիվանդանոց՝ բուժօգնություն ստանալու համար:
Նշենք նաև, որ այս պահին բերման ենթարկվածներից շատերի նկատմամբ քրեական գործեր են հարուցվում խուլիգանության հոդվածով:
Լուսանկարը՝ Photolure-ի
