Իրանի հետ նրա միջուկային ծրագրին առնչվող վերջնական համաձայնագիրը պետք է պարտադիր ներառի դրույթ՝ առանց բացառության բոլոր միջուկային և ռազմական օբյեկտներին միջազգային տեսուչների հասանելիության տրամադրման մասին։ Փարիզի այդ դիրքորոշումը Wall Street Journal-ին տված հարցազրույցում հաստատել է Ֆրանսիայի արտգործնախարար Լորան Ֆաբիուսը։
«Ամենալավ համաձայնագիրն անօգուտ է, եթե անհնար է ստուգել, թե ինչպես է այն իրականացվում»,- կարծում է Ֆաբիուսը։ Եթե Իրանը հայտարարում է, որ տեսուչները չեն կարող ստուգել ցանկացած միջուկային օբյեկտ, դա համաձայնագիր չէ՝ ասել է Ֆաբիուսը։
«Եթե Թեհրանը ցանկանում է միջուկային զենք ստեղծել՝ շրջանցելով պայմանավորվածությունները, այն անխուսափելիորեն կանի դա ռազմական կամ ցանկացած այլ գաղտնի օբյեկտում»,- հավելել է նախարարը։
Իրանի գերագույն առաջնորդ այաթոլլա Ալի Խամենեին ավելի վաղ հայտարարել էր, որ ԱԷՄԳ-ի փորձագետներին ոչ մի տեսչական ստուգումներ Իրանի ռազմական օբյեկտներում չեն թույլատրվի։
