«Ոչ միայն Հայաստանի, այլև այլ երկրների օրինակներից կարող եմ ասել, որ այնպիսի հզոր ցանցը, ինչպիսին «Կառֆուրն» է, կարող է ազդել թե՛ քաղաքականության, թե՛ ընդհանրապես երկրի տնտեսության վրա: Եվս մեկ փաստ, որին ես ծանոթ եմ՝ Հայաստանում մենաշնորհները հիմնականում պարենամթերքների ներմուծման հետ են կապված, և տնտեսության ու քաղաքականության փոխկապակցվածությունը, երբ մենաշնորհներ ունեցողները, որոնք ազդեցություն ունեն կառավարության վրա, վարվող քաղաքականության վրա, միգուցե կվախենային մրցակից ունենալ այդ բնագավառում»,- «Առաջին լրատվական»-ի հետ զրույցում ասաց «Ֆրիդրիխ Էբերտ» հիմնադրամի Եվրոպական տարածաշրջանային ներկայացուցիչ Մայքլ Վեյհարտը՝ մեկնաբանելով ֆրանսիական հիպերմարկետների «Կառֆուր» ցանցի՝ ՀՀ մուտք գործելու հետ կապված խոչընդոտների մասին տարածված լուրերը: Նա նշեց, որ փորձագետ չէ այդ բնագավառում և չգիտի «Կառֆուրի» դեպքի հետ կապված մանրամասներն, ու միանշանակ գնահատական տալ չի կարող:
«Եթե ձեր կառավարությունը վերջիվերջո արգելի «Կառֆուրին» գալ Հայաստան, փաստորեն սա կլինի այն դեպքը, որ կարող է հետևանք ունենալ երկրի քաղաքականության, հետագա զարգացումների վրա: Դա կարող է ազդեցություն ունենալ այլ ներդրողների հետ կապված, քանի որ, բնականաբար, եթե կան նպատակներ, որ ուզում են այստեղ ներդումներ անել, նման մասնակցություն ունենալ Հայաստանի տնտեսությունում, այսուհետ նրանք կմտածեն՝ գործունեություն ծավալե՞լ, թե՞ ոչ, եթե այստեղ կա մի խումբ, որը կարող է ազդեցություն ունենալ երկրի ղեկավարության և ընդհանուր քաղաքական որոշումների վրա»,- ասաց Մայքլ Վեյհարտը:
Ըստ նրա՝ շատ ներդրողներ, այդ թվում՝ գերմանացի, ամենամեծ ուշադրությունը դարձնում են երկրի իրավականության վրա: Եվ, իհարկե, պոտենցիալ ներդրողները քննում են, հետևում են, թե ինչ է կատարվում երկրում, և, ըստ Վեյհարտի, այս դեպքը նույնպես կունենա իր ազդեցությունը, որ միջազգային ներդրողները փոխեն իրենց որոշումը և Հայաստանում ներդրումներ չանեն:
