Երեկ Կենտրոնական ընտրական հանձնաժողովը հաստատեց կառավարության կողմից իրականացվող` համայնքների խոշորացման ծրագրի շրջանակներում մայիսի 17-ին պիլոտային ծրագրում ընդգրկված 3 մարզերի մի շարք համայնքներում հանրաքվեի անցկացման կարգը և ժամանակացույցը: Ըստ այդմ` Տավուշի, Լոռու եւ Սյունիքի մի քանի համայնքներում նշված օրը հանրաքվե կանցկացվի, որի ժամանակ բնակիչները պետք է քվեարկեն՝ համաձա՞յն են, որ իրենց համայնքները խոշորացվեն, միավորվեն մեկ համայնքի կազմում, թե՞ ոչ: Այդ հանրաքվեի արդյունքում էլ արդեն կառավարությունը կկողմնորոշվի` իրականացնե՞լ ծրագիրը, թե՞ ոչ:
Նշենք, որ ծրագրում ընդգրկված համայնքների ղեկավարները մեծ մասամբ դեմ են համայնքների խոշորացմանը՝ համարելով դա աննպատակահարմար քայլ: Նրանք նաև նշում են, որ խոշորացման արդյունքում կփակվեն նաև այն մեկ-երկու աշխատատեղը, որոնք առկա են համայնքապետարաններում, և այս ծրագրի միակ «օգուտը» կլինի այն, որ գյուղերում պարզապես կմեծանա գործազուրկների թիվը:
Ինչ վերաբերում է հանրաքվեին, ապա, համայնքապետերի խոսքով, դրա նկատմամբ գյուղի բնակիչներն անտարբեր կլինեն, քանի որ չգիտեն` ինչ է իրենից ներկայացնում համայնքների խոշորացում ասվածը, ինչ օգուտներ ու վնասներ կան: Այդ ուղղությամբ իրազեկում բացարձակապես չի իրականացվել:
«Հանրաքվեի նկատմամբ մարդիկ անտարբեր կլինեն, այնպես, ինչպես 2005 թվականին Սահմանադրության քվեարկության ժամանակ: Չեն գնա, չեն մասնակցի, որովհետև ոչ մի բան չգիտեն այդ ծրագրից: Իսկ եթե գան, բացատրեն ժողովրդին, թե ինչ է դա, ինչով է լավ, գուցե ժողովուրդն ակտիվանա ու գնա, մասնակցի հանրաքվեին, ինչը քիչ հավանական եմ համարում»,- օրերս մեզ հետ զրույցում ասել էր Տավուշի մարզի Հաղարծին համայնքի համայնքապետը:
Թեև համայնքների խոշորացման հիմնական պատճառաբանությունը համարվում է համայնքներին ուղղված միջոցների խնայողությունը, սակայն կան պնդումներ, որ այս ծրագիրը քիչ ավելի հեռահար է և ավելի շատ կապված է առաջիկա ընտրությունների հետ: Կարծիք կա, որ համայնքների խոշորացմամբ կխոշորանան նաև ընտրատարածքները եւ ընտրատեղամասերը, ինչը նշանակում է, որ առավել կհեշտանա դրանց «կառավարումը»:
Կխոշորանա՞ն, արդյոք, ընտրատարածքները եւ ընտրատեղամասերը՝ հարցրինք Կենտրոնական ընտրական հանձնաժողովի նախագահ Տիգրան Մուկուչյանից: Ըստ նրա` ընտրատարածքների ձևավորումը սկզբունքորեն չի կապվում այս հարցի հետ, քանի որ ընտրատարածքները ձևավորվում են` հիմքում ունենալով ընտրողների թիվը: «Նախ պետք է հասկանանք, որ դեռ նոր պետք է հանրաքվե տեղի ունենա: Հանրաքվեի արդյունքների հիման վրա նոր միայն կառավարությունը որոշելու է հանդես գալ նախաձեռնությամբ` միավորե՞լ համայնքները, թե՞ ոչ: Եվ եթե միավորման արդյունքում ընտրական օրենսգրքով այս պահին սահմանված չափանիշը` ընտրողների թվի, բավարարվի, ապա խնդիր չի լինի: Իսկ միավորումից հետո արդեն ընտրողների թիվը կհաշվվի, և եթե սահմանների անցում նկատվի, դրանից հետո նոր միայն անհրաժեշտություն կառաջանա անդրադառնալ ընտրատարածքների միավորման հարցին»,- «Առաջին լրատվական»-ի հետ զրույցում ասաց Մուկուչյանը:
Նա նաև հավելեց, որ ընտրական տեղամասերը ձևավորվում են ոչ ավելի, քան երկու հազար ընտրող հաշվով, և եթե անգամ մի քանի բնակավայրեր միավորվում են, դրանք շարունակելու են լինել որպես առանձին բնակավայրեր: «Հետևաբար, եթե նրանց ընտրողների թվերը շատ ավելի փոքր են, բայց տարածքային հեռավորությունը շատ ավելի մեծ է, ապա ակնհայտ է, որ չի կարող լինել մեկ ընտրական տեղամաս, որը կկազմակերպի և կիրականացնի, ասենք, 2 կամ ավելի բնակավայրերում ընտրությունների կազմակերպումը: Տեղամասը ձևավորվում է բնակավայրում և կապված է բնակավայրի ընտրողների թվի հետ: Սրանք իրար հետ չկապվող խնդիրներ են, ընդհանրապես»,- հավելեց Մուկուչյանը:
Ամեն դեպքում, ԿԸՀ նախագահի խոսքով, եթե հանրաքվեից հետո ինչ-ինչ հարցեր էլ առաջանան, ապա դրանք հետագայում նոր օրենսդրական ակտերի միջոցով կկարգավորվեն:
Այս խնդրի կապակցությամբ փորձեցինք զրուցել նաև «Ընտրությունը քոնն է» հասարակական կազմակերպության հետ, որը մշտապես դիտարկում է թե՛ համապետական, թե՛ ՏԻՄ ընտրությունները: ՀԿ-ի նախագահը, սակայն, ասաց, որ իրենք դեռ ուսումնասիրում են խնդիրը:
