Իսրայելի վարչապետ Բենիամին Նեթանյահուն երեքշաբթի օրը ելույթ կունենա ԱՄՆ սենատի և կոնգրեսի ներկայացուցիչների պալատի անդամների առջև, նրա խոսքը նախատեսվում է տեղական ժամանակով ժ. 10.45-ին (Երևանի ժամանակով՝ 19.45-ին): Այս մասին հայտնում է Ria Novosti-ն:
Իսրայելի վարչապետի ելույթի մասին հայտնի դարձավ մի քանի շաբաթ առաջ և անմիջապես որոշակի սկանդալայնության երանգ ստացավ: Բանն այն է, որ Նեթանյահուին կոնգրես է հրավիրել ներկայացուցիչների պալատի խոսնակ՝ հանրապետական Ջոն Բեյները: Ընդ որում՝ նա դա արել է՝ շրջանցելով Սպիտակ տանը։
ԱՄՆ վարչակազմն արդեն ակնարկել է, որ հավանության չի արժանացնում երեքշաբթի օրը ԱՄՆ կոնգրեսում Նեթանյահուի ելույթի գաղափարը: ԱՄՆ նախագահ Բարաք Օբաման այս անգամ չի պատրաստվում հանդիպել Նեթանյահուի հետ: Սպիտակ տան ներկայացուցիչ Ջոշ Էռնեստը մի քանի անգամ բացատրել է, թե ինչու Օբաման չի պատրաստվում Նեթանյահուին հրավիրել Սպիտակ տուն:
Նշվում էր, որ բարձրաստիճան հյուրի այցից մի քանի շաբաթ հետո Իսրայելում նշանակված են ընտրություններ, իսկ ԱՄՆ նախագահն աշխատում է խուսափել այդպիսի ընտրություններից առաջ օտարերկրյա ղեկավարներին հրավիրելուց, որպեսզի ոչ ոք չմտածի, թե ԱՄՆ-ը այդպիսով փորձում է ազդել իրավիճակի վրա:
Ավելի վաղ Իսրայելի վարչապետ Բենիամին Նեթանյահուն հաստատել է, որ ԱՄՆ կոնգրեսում պլանավորված ելույթի ժամանակ դեմ հանդես կգա Իրանի միջուկային ծրագրի շուրջ պոտենցիալ համաձայնագրի կնքմանը:
Նա ասել է, որ չի կարող այս հարցում անմասնակից լինել, որը կարող է սպառնալ Իսրայել պետության անվտանգությանը:
