Սիրիայի հարցով ՄԱԿ-և ԱՊԼ-ի հատուկ պատվիրակ Լախդար Բրահիմին կարծում է, որ «Գործողությունների խմբի» ժնևյան կոմյունիկեն անհրաժեշտ է պարզեցնել՝ ազատելով այն երկիմաստ սահմանումներից: Այս մասին հայտնում է ITAR-TASS-ը:
Երեքշաբթի ելույթ ունենալով ՄԱԿ-ի Անվտանգության խորհրդի խորհրդակցությունների ժամանակ, Բրահիմին ընդգծել է, որ դա վերաբերում է նաև այն կետին, որը նախատեսում է Սիրիայում լիարժեք իշխանությամբ անցումնային կառավարության ստեղծելուն: Նա անհրաժեշտ է համարում հստակեցնել, որ Ասադը չպետք է որևէ դեր ունենա իշխանության փոխանցման մեջ:
ՄԱԿ-ի կենտրոնակայանի դիվանագիտական աղբյուրները հերքել են արևմտյան ԶԼՄ-ներում հայտնված այն տեղեկությունը, թե երկժամյա խորհրդակցությունների ժամանակ Բրահիմին հայտարարել է սիրիական ղեկավարության լեգիտիմության կորստի և Ասադի հեռանալու անհրաժեշտության վերաբերյալ: Նրանց խոսքով՝ պատվիրակը միայն փաստել է ընդդիմությանը աջակցող երկրների դիրքորոշումը:
Այսօր Քուվեյթում բացվում է դոնոր երկրների միջազգային կոնֆերանսը, որի ժամանակ ՄԱԿ-ը հույս ունի լուծել սիրիացիների օգնության միջոցների սղության հարցը: Կազմակերպության տվյալներով՝ հաջորդ 6 ամիսներին սիրիացիներին մարդասիրական օգնության տրամադրման համար 1.5 մլրդ դոլար է պահանջվում:
