Posterous բլոգոհոսթինգը օգտատերերին հնարավորություն էր ընձեռել ծառայությունից ներբեռնել սեփական բոլոր լուսանկարների և տեսանյութերի արխիվը: Այս մասին հաղորդվում է Posterous-ի բլոգում:
The Next Web պարբերականը ենթադրել է, որ այդ գործառույթի ի հայտ գալը կապված է բլոգոհոսթինգի մոտալուտ փակման հետ: Posterous-ի ներկայացուցիչներից պարբերականը պաշտոնական մեկնաբանություններ չի ստացել:
2012 թվականի մարտից Twitter միկրոբլոգների ծառայությունը գնել է Posterous-ը և վարձել բլոգոհոսթինգի աշխատակիցներին: Այդ ժամանակ Posterous-ի ներկայացուցիչները խոստացել էին մի քանի շաբաթից թողարկել արխիվի ներբեռնման գործառույթ:
Օգտատերերին վստահեցրել էին նաև, որ բլոգոհոսթինգն առանց նախազգուշացման չի փակվի:
Պարբերականը նշում է, որ գործարքից հետո Posterous-ում բազմիցս ի հայտ են եկել տեխնիկական թերություններ, որոնք հանգեցրել են ծառայության տևական անաշխատունակության: Պարբերականը ենթադրում է, որ 2013-ին բլոգոհոսթինգն ընդհանրապես կփակվի:
Posterous-ը թույլ է տալիս հրապարակել լուսանկարներ և տեսանյութ ինչպես վեբ ինտերֆեյսի, այնպես էլ բջջային հավելվածի և էլեկտրոնային փոստի միջոցով: Ծառայությունը գործարկվել էր 2008 թվականին:
