Վենեսուելայի նախագահ Ուգո Չավեսը, ելույթ ունենալով ազգային հեռուստատեսությամբ, հայտարարել է, որ ամերիկյան իմպերիալիզմը և նրա դաշնակիցները փորձում են իրեն Քադաֆիի հետ նույն շարքին դասել, որպեսզի հետագայում ինքն էլ դառնա «ռազմական թիրախ»: Այս մասին հաղորդում է Reuters գործակալությունը:
«Մենք հիմա տեսնում ենք, թե ինչպես պատռվեց իմպերիալիզմի դիմակը, մի կողմ դրվեց բարոյականությունը, և օգտվելով մտացածին առիթից` միջազգային կոալիցիան սկսեց ռմբակոծել լիբիական քաղաքները, սպանել խաղաղ բնակիչներին: Փորձեր են արվում Չավեսին Քադաֆիի հետ նույն շարքում դասել՝ որպես դաժան բռնակալների, որոնք հետապնդում են իրենց ժողովուրդներին»,- ասել է Չավեսը:
Չավեսը նշել է, որ լատինաամերիկյան լիդերների մեջ էլ կան «անպետք» թեկնածուներ, բայց «ինքն առաջինն է»: Սակայն նա նշել է, որ փրկություն կա, և դա լատինաամերիկացիների միասնության մեջ է. «Մեզ բոլորիս անհրաժեշտ է համախմբել շարքերը Բոլիվարական դաշինքի շրջանակներում և առաջ տանել բոլիվարական սոցիալիզմ կառուցելու մեր նախագիծը ` ժողովրդավարության և խաղաղության հիմքի վրա»,- ասել է Չավեսը: «Մեր հիմնական խնդիրն է ամեն ինչ անել, որպեսզի խուսափենք պատերազմից, երկրի զարգացման համար ապահովենք խաղաղություն: Պատերազմը մեր ճանապարհը չէ»,- ավելացրել է Չավեսը:
