Ռուսական «Վզգլյադ» թերթի փոխանցմամբ՝ Ռուսաստանի նախագահ Վլադիմիր Պուտինը, պատասխանելով Վրաստանի նոր կառավարության հետ հարաբերությունների վերաբերյալ «Ռուսթավի 2» հեռուստաալիքի հարցին, հայտարարել է, որ դրական ազդանշաններ է տեսնում վրացական նոր իշխանություններից և ողջունում է դա.
«Մենք դրական ազդանշաններ ենք տեսնում վրացական նոր իշխանություններից և որ Վրաստանում նշանակվել է Ռուսաստանի հետ հարաբերությունների կարգավորման գծով հատուկ ներկայացուցիչ: Մենք ողջունում ենք դա: Սակայն ես ցանկանում եմ ձեր ուշադրությունը հրավիրել մեկ խնդրի վրա:
Գործող նախագահ Սաակաշվիլին իրավիճակը փակուղի է մտցրել: Անկեղծ ասած ես չգիտեմ, թե ինչպես դուրս գալ այդ իրավիճակից: Ռուսաստանը չի կարող փոխել Աբխազիայի ու Հարավային Օսիայի անկախության ճանաչման որոշումը:
Մենք ցանկանում ենք կարգավորել Վրաստանի հետ հարաբերությունները: Տնտեսական տեսանկյունից Վրաստանն ավելի շահագրգռված է դրանում: Սակայն մենք չենք պատրաստվում մեր քթերը վեր ցցել, մենք կարծում ենք, որ պետք է կարգավորվեն երկու շատ մոտ ժողովուրդների միջև հարաբերությունները: Ես դեռ պատասխան չունեմ, թե ինչպես կարելի է հաղթահարել ամենաբարդ խնդիրները»:
