Ֆրանսիական նավահանգստային Կալե քաղաքը դարձել է սահմանային ճգնաժամի կենտրոն։ Այն հեղեղել են Արևելյան Աֆրիկայից հարյուրավոր փախստականներ՝ փորձելով հասնել Մեծ Բրիտանիա։ Քաղաքի իշխանությունները պահանջում են բրիտանական սահմանը տեղափոխել Լա Մանշի մյուս ափը։ Սակայն, այդ նախաձեռնությունը Մեծ Բրիտանիան չի ողջունում, գրում է russian.rt.com-ը։
Կալեն ժամանակավոր հանգրվան է դարձել ընչազուրկների, անօթևան գաղթյալների համար, որոնք հիմնականում եկել են Արևելյան Աֆրիկայից ու Մերձավոր Արևելքից։
Նրանց մեծամասնության նպատակը Լա Մանշն անցնելն է։ Ամեն շաբաթ, թաքնվելով մեծ բեռնատար ավտոմեքենաներում, հարյուրավոր փախստականներ փորձում են անլեգալ Մեծ Բրիտանիա հասնել։ Ըստ հաշվարկների Կալեում ավելի քան մեկուկես հազար գաղթյալ կա։
Կալեի քաղաքապետ Նատաշա Բուշարը հայտարարել է, թե փախստականների մեծ թվի պատճառով քաղաքի բնակիչներն իրենց անվտանգ չեն զգում, իսկ ներդրողները լքում են տարածաշրջանը։ Բուշարն այնքան սրտնեղած է, որ պատրաստ է բոլոր գաղթյալների համար Մեծ Բրիտանիա տանող լաստանավի տոմս գնել։ Նա նույնիսկ խնդրել է տեղափոխել բրիտանական սահմանը, որը ներկայումս գտնվում է Կալեից Դուվր անցումի մոտ։
