ԱԺ ՕԵԿ խմբակցության պատգամավոր Մհեր Շահգելդյանը հնարավոր քաղաքական զարգացումների մասին այսօր կարող է խոսել՝ ելնելով այն իրավիճակից, որ այսօր առկա է, և մոտակա ժամանակներս քաղաքական ուժերն արդեն կարտահայտեն իրենց դիրքորոշումներն ու մոտեցումները: Ըստ նրա՝ միայն այդ ժամանակ կտեսնենք, թե ինչպես կզարգանան իրադարձությունները: Լրագրողների հետ հանդիպմանը նման կարծիք հայտնեց Մ. Շահգելդյանը: «Մեր դիրքորոշումը հստակ է: ՕԵԿ-ն արդեն արտահայտել է այն»,- ասաց նա:
Ինչ վերաբերում է ընդդիմության չկողմնորոշվածությանը նախագահական ընտրությունների նախաշեմին, ապա վերջինս ասաց, որ քաղաքական ուժերն արդեն պետք է կողմնորոշված լինեին, ու դա միայն մեկ բան է հուշում՝ նրանք փորձում են որոշումներ ու լուծումներ գտնել: «Դա նշանակում է՝ նրանք դեռ չեն մոտեցել այդ լուծումներին: Միգուցե կան քննարկումներ, փորձում են իրենց ուժերը հաշվարկել՝ հասնակալ, թե ինչ քաղաքական ու ռազմավարական քայլեր ձեռնարկել»,- ասաց նա:
Բանախոսը ընդդիմության շարքերում չի տեսնում համախմբման գործընթաց, այլ քննարկումներ ու հանրային քննարկումների գործընթաց:
Ինչ վերաբերում է խորհրդարանում ընտրական մեծամասնական համակարգին, ապա, ըստ նրա, ՕԵԿ-ը միշտ ասել է, որ առավելաչափ համամասնական ընտրական համակարգ ունենալը դրական է: «Չմոռանանք, որ մեծամասնական տեղերից 56-ի կրտաճումը եղավ ՕԵԿ-ի շնորհիվ, սակայն մեր խնդիրն այն է, թե ինչու է հիմա՝ այս նախագահական ընտրություններից առաջ: Մենք գտնում ենք, որ այս խնդիրը կարևոր է, ու այդ խնդրին կարելի է անդրադառնալ նախագահական ընտրություններից հետո»,- ասաց նա:
Ինչ վերաբերում է խորհրդարանական կառավարման ձևին, ապա, ըստ նրա, դա ժամանակավրեպ է ու անընդունելի, քանի որ առավել կարևոր խնդիրը տվյալ դեպքում անվտանգության համակարգն է: «Մենք այսօր բարդ տարածաշրջանում ենք գտնվում, ունենք Լեռնային Ղարաբաղի խնդիր, ինչը պահանջում է կենտրոնացված կառավարում և այս տեսանկյունից խորհրդարանական կառավարման ձևը գտնում ենք ժամանակավրեպ ու ոչ ընդունելի»,- հավելեց Մ.Շահգելդյանը:
