«Ժողովուրդ»-ին հայտնի է դարձել, որ Սերժ Սարգսյանը մտադիր է չստորագրել և արդեն առարկություններով հետ է վերադարձրել «ՀՀ քննչական կոմիտեի մասին» ՀՀ օրենքը: Նշենք, որ ԱԺ-ն, մայիսի 19-ին 88 կողմ, 32 դեմ և 1 ձեռնպահ ձայների հարաբերակցությամբ ընդունել էր օրենքը և համաձայն ՀՀ Սահմանադրության՝ նախագահը պետք է 21-օրյա ժամկետում ստորագրությամբ վավերացնի օրենքը կամ հետ վերադարձնի ԱԺ: Վերջնաժամկետն արդեն ավարտվել է և Ս.Սարգսյանն այն մերժել է՝ նոր ստեղծվող մարմնի համար անհրաժեշտ ֆինանսական միջոցների բացակայության պատճառով: Այսինքն՝ 2014թ. պետական բյուջեում նախատեսված չեն համապատասխան գումարներ քննչական մարմնի աշխատակիցների համար: Բանն այն է, որ նրանց համար նախատեսված էր բավականին բարձր աշխատավարձ: Իհարկե, այստեղ հարց է առաջանում, թե այդ դեպքում ի՞նչ տրամաբանությամբ կառավարությունը մայիսի 22-ի նիստում ընդունեց քննչական կոմիտեի շենքի վերանորոգման նպատակով 27,5 մլն դրամ գումար հատկացնելու մասին որոշումը: Գուցե այդ գումարով կառավարության հաշվեկշռում գտնվող շենքի վերանորոգումը այլ նպատակի՞ պետք է ծառայի:
Ինչևէ, դժվար է միանշանակ պնդել՝ ֆինանսական միջոցների՞, թե՞ ուղղակի ցանկության բացակայությունն է պատճառը, որ այսքան մեծ աղմուկ հանած նախագիծն այսպես անաղմուկ ավարտ ունեցավ: Թեև կոմիտեի՝ նման վերջաբանը կարելի էր կանխատեսել դեռ անցալ տարի՝ կոմիտեի կազմից ՊԵԿ-ի քննչական մարմնի դուրս բերման ժամանակ: Այդ պահից, թերևս, կանխորոշված էր Քննչական կոմիտեի ճակատագիրը, իսկ հետագա գործընթացն ընդամենը ծավալվում էր Աղվան Հովսեփյանին զբաղեցնելու համար:
Մանրամասները՝ թերթի այսօրվա համարում:
