Այսօր Վերաքննիչ դատարանում ընդհատվեց Մարզահամերգային համալիրի ղեկավարության հայցն ընդդեմ ԱՆ ԴԱՀԿ-ի դատական նիստը, քանի որ դատարանը որոշել էր դռնփակ նիստ անցկացնել, սակայն համալիրի ներկայացուցիչները չհամաձայնեցին դրան: Դատարանը նման որոշում կայացրեց այն բանից հետո, երբ ԴԱՀԿ ներկայացուցիչը չհամաձայնեց, որ նիստին ներկա լրագրողները տեսանկարահանեն նիստը:
«Եթե ամեն ինչ բաց, թափանցիկ է արվում, ինչու են ուզում դռնփակ նիստ անել, անհասկանալի է»,- լրագրողների հետ զրույցում հարց ուղղեց համալիրի ներկայացուցիչ Կորյուն Գրիգորյանը՝ տեսակետ հայտնելով, որ դատարանն ուզում է դռնփակ աշխատել ինչ-ինչ ապօրինություններ կոծկելու համար:
Կորյուն Գրիգորյանի խոսքերով՝ մոտ երկու-երեք ամիս է, համալիրի բանկային հաշիվները սառեցվել են և հնարավորություն չի տրվում պարտքը մարելու: «Երբ համալիրի բյուջե գումար է մտնում, դա ԴԱՀԿ-ը բռնագանձում է»:
Մեր հարցին՝ դա նշանակո՞ւմ է, որ համալիրի աշխատակիցները աշխատավարձեր չեն ստանում, Գրիգորյանը պատասխանեց. «Իսկ ի՞նչ ստանան, եթե Համալիրի բյուջեում ընդհանրապես գումար չի մնում: Եթե գումար նստեց հաշվին, գումարը գնում է»:
Համալիրի ներկայացուցչի խոսքերով՝ իրենց աշխատանքները կաթվածահար վիճակում են. «Խեղդամահ են անում ուղղակի, չեն թողնում, որ աշխատենք»:
Մարզահամերգային համալիրի տնօրինությունը դիմել է վարչապետին և նոր կառավարությանը, որ պարտքի մարման ժամանակացույց ֆիքսվի և հարցը լուծվի: «Մինչև այդ մեզ տեղյակ չեն էլ պահել, որ հայց է գնացել դատարան: Ուշացում կար, բայց կոնֆլիկտները մարելու լավագույն տարբերակը բանակցելն է ու փորձել հարցը լուծել»,- ասաց Կորյուն Գրիգորյանը՝ հավելելով. «Հիմա երկրորդ աճուրդի են բերում 10 տոկոս ավելի ցածր գնով: Այսինքն՝ սեփականության 10 տոկոս ցածր գնով պատրաստ են վաճառել ուրիշի գույքը: ԴԱՀԿ-ն աշխատում է էնպես, որ ավելի շատ հիշեցնում է ինչ-որ մեկի ՍՊԸ-ն, քան թե պետական համակարգում աշխատող կառույց»:
Ըստ Մարզահամերգայինի ներկայացուցչի՝ պետբյուջեն Մարզահամերգային համալրին վարկ չի տվել, պետբյուջեից գումարը հատկացվել է «ԲԱՄՕ մետաղի» համար, իսկ Մարզահամերգային համալիրը վերցրել է իր վրա պատասխանատվությունը գույքով:
«Հետաքրքիր մի բան կա. պետբյուջեում գրանցված չէ վարկային պայմանագիրը: Եթե պետբյուջեին նայում եք, պետք է երևա, որ Մարզահամերգային համալիրը պետբյուջեին պարտք է էսքան գումար՝ 10 մլրդ 200 մլն դրամ»:
Հիշեցնենք, որ օրեր առաջ դրված աճուրդում որպես համալիրի մեկնարկային գին սահմանվել էր 19 մլրդ 35 մլն դրամը՝ մոտ 48 մլն դոլար, սակայն որևէ գնորդ չհայտնվեց: Այս անգամ համալիրն աճուրդի է հանվել մոտ 2 մլրդ դրամ էժան՝ 17 մլրդ 415 մլն դրամ արժեքով: Ինչպես մեզ փոխանցել էին ՀՀ արդարադատության նախարարության Դատական ակտերի հարկադիր կատարման ծառայությունից, «Մարզահամերգային համալիրը դեռ չունի գնորդ կամ հավակնորդ»:
Ի դեպ, այս անգամ ԴԱՀԿ աճուրդի հայտում ներառվել է պայման, համաձայն որի՝ Մարզահամերգային համալիրը «մշակույթի անշարժ հուշարձան» է:
«ՀՀ կառավարության 2004 թվականի հոկտեմբերի 7-ի N 1616-Ն որոշման համաձայն՝ Մարզահամերգային համալիրը հանդիսանում է պատմության և մշակույթի անշարժ հուշարձան, որի սեփականատիրոջ (գնորդի) համար գործում են «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքով, ՀՀ կառավարության 2002 թվականի ապրիլի 20-ի N 438 և 2005 թվականի օգոստոսի 25-ի N 131-Ն որոշումներով նախատեսված պարտականությունները»,- գրված է մրցույթի հայտում:
Հիշեցնենք, որ այս առթիվ մտահոգություն էին հայտնել համալիրը նախագծող ճարտարապետները և ուրիշներ:
Ինչպես հայտնի է, Մարզահամերգային համալիրի սեփականատերը ԲԱՄՕ ընկերության սեփականատեր Մուրադյան եղբայրներն են:
