Հյուսիսային Կորեայի 25 մլն բնակիչներից մոտ 16-ը տառապում է քրոնիկ թերսնուցմամբ, նրանք ապրում են հակահիգիենիկ պայմաններում և չունեն անհրաժեշտ դեղամիջոցներ: Այսպիսի գնահատական է տրվել Հյուսիսային Կորեայում ՄԱԿ-ի ներկայացուցիչ Մարզուկի Դարուսմանի զեկույցում` փոխանցում է BBC-ն:
Նշվում է, որ Դարուսմանը ԿԺԴՀ-ում նոր ղեկավար Կիմ Չեն Ինի օրոք մարդու իրավունքների բարելավում չի նկատել:
Զեկույցում ՄԱԿ-ի հատուկ ներկայացուցիչը Փխենյանին կոչ է արել բանակին ուղղվող միջոցները հատկացնել բնակչության ավելի քան 60%-ին օգնելուն:
Դարուսմանը քննադատել էԿիմ Չեն Ինին, որը երկրում առաջնահերթ է համարում զինված ուժերի ամրապնդումը: Նրա քննադատությունն ուղղված էր նաև կառավարությանը: ՄԱԿ-ի հատուկ ներկայացուցչի խոսքով` Հյուսիսային Կորեայում «բնակչությանը դասակարգում են ըստ վարչակարգին հավատարմության, ինչը հանգեցնում է սննդի, բնակության վայրի, բժշկական օգնության, զբաղվածության և կրթության անհավասար պայմանների»:
Հյուսիսային Կորեայի բարձրաստիճան պաշտոնյա Կիմ Սոնգը կտրականապես դեմ է արտահայտվել զեկույցում պարունակվող ենթադրություններին` դրանք անվանելով «չհիմնավորված պնդումներ» և «քաղաքական դավադրություն»: «Մենք ոչինչ չունենք թաքցնելու և վախենալու: Ընդհակառակը` մենք հպարտ ենք մարդու իրավունքները երաշխավորող հրաշալի համակարգով, ներառյալ` անվճար բժշկական օգնությունը և կրթությունը»,- նշել է նա:
