«Կոռուպցիան պաշտոնական դիրքի չարաշահումն է՝ օգուտ ստանալու միջոցով, որ կարող է տարբեր դրսևորումներ ունենալ՝ կաշառքի, անձնական դիրքի չարաշահման, ատկատների: Այսինքն, նա ոչ թե նպատակային է օգտագործում պաշտոնը, այլ օգուտներ քաղելու համար»,- կոռուպցիայի այսպիսի սահմանում տվեց «Transparency Int’l հակակոռուպցիոն կենտրոնի» փոխտնօրեն Սոնա Այվազյանը՝ հյուրընկալվելով «Երկիր մեդիա» հեռուստաալիքի «Երկրի հարցը» հաղորդմանը: Գուցե մեր երկրում կոռուպցիոներների թիվը շատ չէ, սակայն, Սոնա Այվազյանի գնահատմամբ, նրանց քաղած օգուտները ազդեցություն ունեն ողջ հասարակության վրա:
Կոռուպցիայի ընկալման 1-10 բալանոց սանդղակում Հայաստանը 2.6 բալ ունի: Մինչև 5 բալը նշանակում է, որ պետական համակարգը թաղված է կոռուպցիայի մեջ: «Անկախության տարիներին բազմաթիվ սոցիալ-տնտեսական բարեփոխումներ չեն հասել իրենց նպատակին հենց կոռուպցիայի պատճառով: Միջազգային կառույցները օգնություն էին տրամադրում, ու հասկանում էին, որ այդ գումարը նպատակին չի ծառայում: Կոռուպցիան այժմ ավելի է ամրապնդվել, և հիմա առավել դժվար է պայքարել դրա դեմ»,- ասել է Սոնա Այվազյանը:
«Կոռուպցիա» բառը Հայաստանում սկսելէ օգտագործվել 2000-ականներից: 2003 թ. սկսվեցին օրենսդրական բարեփոխումները: Սոնա Այվազյանի խոսքերով, հակակոռուպցիոն բաղադրիչը մեծ կլինի, եթե և օրենսդրական, և դատապարտող միջոցառումներն են ուժեղ և կա հասարակական աջակցություն, որը 2003 թ. ընդունված ռազմավարության մեջ չէր կարևորվել:
«Ռազմավարությունում ներառված միջոցառումներն իրականացվեցին կիսատ-պռատ, ապա հայտարարեցին, թե իրականացվել են»,- ասել է Սոնա Այվազյանը և հավելել, որ հասարակությունը կարծում է, որ կոռուպցիայի դեմ պայքարն անարդյունավետ է: Հակակոռուպցիոն երկրորդ ռազմավարությունը ևս, բանախոսի խոսքերով, ձախողվել է, կոռուպցիոներ չինովնկների նկատմամբ միջոցառումներ չեն իրականացվել: «Մենք ականատես ենք փաստերի, երբ կոռուպցիայի մեջ մեղադրվող պաշտոնյաների պաշտոններ են առաջարկվում: Օրինակ՝ նույն Վարդան Այվազյանի հետ կապված: Ասում էին, որ հանքերի լիցենզիաներ է նվիրում իր ծանոթ-բարեկամներին, բայց նա պատգամավոր ընտրվեց և նրա համար էլ բացեցին տնտեսական հարցերի հանձնաժողովը»,- ասել է հակակոռուպցիոն կենտրոնի փոխտնօրենը: Նա տագնապ է հայտնել, որ լրագրողների բացահայտումները ևս արձագանք չեն ստանում. «Մենք բազմիցս ենք դիմել գլխավոր դատախազություն՝ նրանց ուշադրությունը բերելու լրագրողական հետաքննությունների վրա, սակայն, որպես կանոն, նրանք հանցակազմ չեն տեսնում: Դատախազությունը միշտ աչք է փակել»:
Կոռուպցիայի դեմ արդյունավետ պայքարի հարցում Սոնա Այվազյանը միայն քաղաքական կամքն է կարևորում և ասում, որ կհավատա իշխանության անկեղծությանը, երբ հասարակության աչքում կոռուպցիոներ որոշ պաշտոնյաներ այս օրերին ձերբակալվեն կամ ազատվեն պաշտոններից: «Կռոռուպցիայի մեջ եղող մարդիկ այսօր պետության կողմից պաշտպանվում են, իսկ երբ մեկ-երկու դեպք լինում են քրեական գործերի հարուցման, դա ընկալվում է որպես նախընտրական քարոզչության դրսևորում, կամ անձնական հաշվեհարդար, կամ իրենց կանոններով չգործելու հաշվեհարդար»,- ասել է Ս. Այվազյանը։
