«Սենդի» փոթորկի պատճառով ԱՄՆ նախագահ Բարաք Օբաման արտակարգ իրավիճակ է հայտարարել Նյու Յորք և Մասաչուսեթս նահանգներում: Սպասվում է, որ աղետն այս կամ այն չափով կվնասի մի քանի տասնյակ մլն մարդու,- հայտնում է CNN-ը:
Ներկայումս, Սաֆիրա-Սիմփսոնի սանդղակի համաձայն, «Սենդի»-ն դասակարգվում է որպես առաջին կարգի փոթորիկ: Քամու մշտական արագություն 120 կմ/ժ է, երբմն հասնում է 170 կմ/ժ-ի: Ամերիկյան մամուլը «Սենդի»-ն անվանել է «Ֆրանկեյնշտեյն»:
Իշխանություններն ու արտակարգ իրավիճակների ծառայությունները նախօրոք սկսել են պատրաստվել աղետի հարվածին: Նյու Յորք քաղաքում տարհանվել է ավելի քան 375 000 մարդ: Դադարեցվել է շատ տրանսպորտային միջոցների աշխատանքը: Փակ են մետրոն և բոլոր օդանավակայանները, դադարեցվել է հաղորդակցությունը մի քանի ավտոբուսային և երկաթուղային ուղղություններով:
Սպասվում է, որ քաղաքի բորսաները հոկտեմբերի 29-ին առևտուրը կիրականացնեն հիմնականում էլեկտրոնային ռեժիմով: NYSE-ն դադարեցրել է առևտուրն Ուոլ Սթրիթում, նույն կերպ է վարվել նաև NYMEX առևտրային բորսան:
