Այսօր Խանջյան 20 հասցեում, Jose ռեստորանային համալիրի հարևանությամբ տեղի ունեցած փլուզման արդյունքում 11 տուժածներ տեղափոխվել էին «Սուրբ Գրիգոր Լուսավորիչ» բժշկական հաստատություն: Այս պահին տուժածների հետազոտությունները հիմնականում ավարտվել են: «Սուրբ Գրիգոր Լուսավորիչ» բժշկական կենտրոնի բուժանձնակազմը վնասվածքներ ստացած շինարարներին դուրս է բերել շոկային վիճակից։ Տուժածների վիճակին ծանոթանալու նպատակով ՀՀ առողջահության նախարար Դերենիկ Դումանյանն այցելեց «Սուրբ Գրիգոր Լուսավորիչ» բժշկական կենտրոն։
Ինչպես բժշկական կենտրոնում լրագրողների հետ ճեպազրույցի ընթացքում տեղեկացրեց նախարարը, իրեն զեկուցել են, որ երկու հոգու վիճակն այնպիսին է եղել, որ տուն են գնացել, մնացած 9-ը հոգուց մեկի վիճակը գնահատվում է ծանր, ում մոտ գանգոսկրի սալջարդ է: Նախարարի վստահեցմամբ՝ բժիշկները հավաստիացնում են, որ նրա կյանքին վտանգ չի սպառնում:
« Մեկ հիվանդ կոտրվածքներ ունի՝ ստորին ծայրանդամի բաց կոտրվածք, ազդոսկրի վզիկի կոտրվածք և նաև լյարդի ախտահարում, որի ուղղությամբ ևս մասնագետները պետք է աշխատեն, ներքին արյունահոսություն չկա»,- նշեց Դերենիկ Դումանյանը՝ շարունակելով, որ մնացածն ավելի լավ վիճակում են գտնվում են, մի քանի օր բուժհաստատությունում անցկացնելուց հետո դուրս կգրվեն: Նա նաև հավաստիացրեց, որ սա այնպիսի դեպք է, որ ամբողջ ծախսերն իր վրա է վերցնում պետությունը, ուստի որևէ ֆինանսական խնդիր լինել չի կարող:
Հիշեցնենք, որ պարզվել էր տուժածների ինքնությունը` Կամո Ղահրամանյան (50 տ.), Արման Ղազարյան (40 տ.), Արման Գրիգորյան (25 տ.), Արսեն Հայրապետյան (30 տ.), Նահապետ Բադալյան, Վոլոդյա Մաթևոսյան, Սիրակ Թովմասյան, էդիկ Սուքիասյան (30 տ.) և Ռոբերտ Առաքելյան (53 տ.):
