Վարչապետ Տիգրան Սարգսյանն այսօր կառավարության նիստն սկսել է երկրի տնտեսության մի շարք ոլորտներում արմատական բեկում մտցնելու՝ նախարարներին և գերատեսչությունների ղեկավարներին հասցեագրված հանձնարարություններով։ Այսպես. առողջապահության նախարար Դերենիկ Դումանյանին հանձնարարվել է Աբովյանի բժշկական կենտրոնում վերազինման, վերանորոգման աշխատանքները սկսել այս տարի։ Տնտեսական աճի ցուցանիշը բավականին բարձր է սպասվում, բայց որակապես նոր խնդիր կա` 2013-2014 թվականներին համաշխարհային տնտեսությունը հայտնվելու է որակապես նոր վիճակում, զարգացող երկրներում տնտեսական աճի ցուցանիշները նվազում են և այս ճգնաժամային միջավայրը շարունակվելու է նաև 2013 թվականին։ Այդ տեսակետից Տ.Սարգսյանը կարևորել է ներքին ռեսուրսների, ռեզերվերների բացահայտումը։
Վարչապետն առաջին անգամ հրապարակավ հայտարարել է, որ ՀՀ-ում տարբեր ոլորտներում կա աշխատուժի պակաս։ Այս խնդիրը սրությամբ դնում է տեղեկատվական տեխնոլոգիաների ոլորտը, որը տարեկան աճում է 15-20 տոկոսով, ձեռնարկությունների քանակն արդեն կազմում է 300։ Մարզպետները, համայնքների ղեկավարները նույն խնդիրն են բարձրացնում, օրական 5-7 հազար դրամ վարձատրությամբ չեն կարողանում աշխատողներ ապահովել, որպեսզի իրենց առջև դրված խնդիրները կարողանան լուծել։ Քիմիական արդյունաբերությունում, քաղաքապետարանում ևս նմանատիպ խնդիրներ են դրվում, որ աշխատուժի պահանջարկ կա:
Էներգետիկայի և բնական պաշարների փոխնախարար Լևոն Շահվերդյանը հայտարարեց, որ հենց այժմ մոտ 150 տարբեր պրոֆիլի մասնագետների կարիք կա Վանաձորի քիմպրոմի թողարկման հետ կապված։
Երևանի քաղաքապետ Տարոն Մարգարյանի խոսքով` քաղաքապետարանի ենթակայության հիմնարկներում տարբեր ոլորտներում՝ տրանսպորտի, կապի, կանաչապատման, սանմաքրման, մոտ 300 աշխատողի պահանջ կա, հիմնականը վարորդների, կանաչապատման և սանմաքրման աշխատողների։ Միջին աշխատավարձը կազմում է 80 հազար դրամ և դա խնդիր է։
Տ. Սարգսյանը էկոնոմիկայի նախարարությանը հանձնարարել է իրականացնել վերլուծական աշխատանքներ և առաջարկություններ ներկայացնել։
