Ազգային գրադարանի վերանորոգման գործում բացահայտված չարաշահումների մասին նոր մանրամասներ են ի հայտ գալիս:
Հիշեցնենք, որ Ազգային գրադարանի վերանորոգման համար ծախսվել էր մոտ 700 մլն դրամ, բայց արդյունքում շենքի նորոգումը չէր ավարտվել, իսկ նորոգված հատվածներն էլ շատ շուտ քանդվել էին: «Առաջին լրատվական»-ը այցելել էր գրադարան և նկարահանել կիսավերանորոգված շենքը:
Շենքի վերանորոգումը տեղի էր ունեցել քաղաքաշինության նախկին ԲՀԿ-ական նախարար Վարդան Վարդանյանի օրոք: Ընդ որում, այդ աշխատանքներն իրականացնող ընկերությունն ընտրվել էր առանց մրցույթի: Պատվիրատուն եղել էր նախարարությունը, իսկ շինարարը՝ «Հիդրոշինարար-5» ընկերությունը: Վերանորոգման յուրաքանչյուր տարվա համար հատկացվել է ֆիքսված գումար, և առանց մրցույթի 2008 թվականից նույն ընկերությունը մի քանի տարի շարունակ իրականացրել է շինարարական աշխատանքները:
Այսինքն` նախարարությունը կամ նախարարը պարզապես գտել են, չի բացառվում` նաև ստեղծել են այդ ընկերությունը և գրադարանի վերանորոգման պատվերը տվել են այդ ընկերությանը: Միայն վերանորոգման վերջին տարում՝ 2011 թվականին է կազմակերպվել մրցույթ, որի ժամանակ հաղթել է նույն «Հիդրոշինարար-5» ընկերությունը:
Ազգային գրադարանի աշխատակիցներից մեզ տեղեկացրին, որ մինչև վերանորոգման աշխատանքները պատվիրատուն, այսինքն` քաղաքաշինության նախարարությունը, պետք է անցկացներ շենքի սեյսմակայունության վիճակի ստուգման և ամրացման աշխատանքներ, ինչը չի արվել: Շենքն իսկապես ունեցել է սեյսմակայունության խնդիր, բայց չի ամրացվել, և ողջ վերանորոգումն էլ իզուր է անցել: Ինչ էլ որ վերանորոգվել է, սեյսմակայունության խնդիրների պատճառով նորից քանդվել է: Իսկ դա արդեն վկայում է քաղաքաշինության նախարարության և նախարարի ոչ պրոֆեսիոնալիզմի մասին:
Ազգային գրադարանի գործը թեև այժմ ոստիկանությունում է, և արդեն ձերբակալվել է քաղաքաշինության վարչության պետերից մեկը, բայց մեր տեղեկություններով` գործը կհասնի մինչև Վարդան Վարդանյան: Վերջինս թեև այդ գործով որպես վկա նախօրեին հարցաքննվել է, բայց, մեր տեղեկություններով, կներգրավվի նաև որպես մեղադրյալ: Իհարկե, եթե իշխանությունների և «Բարգավաճ Հայաստան» կուսակցության նախագահ Գագիկ Ծառուկյանի միջև քաղաքական համաձայնություն չկայանա:
Որոշ տեղեկությունների համաձայն` ոչ պրոֆեսիոնալ աշխատանքից բացի, գրադարանի վերանորոգման գումարներից զգալի մաս հափշտակվել է: «Առաջին լրատվական»-ը այցելության ժամանակ նկատել էր, որ փոխված մետաղապլաստե պատուհանները և դռները թեև էժանագին որակի էին, սակայն ներկայացվել են շուկայականից ավելի բարձր գնով: Էժանագին են եղել նաև օգտագործված ներկերն ու այլ շինանյութերը, ինչի պատճառով էլ կատարված «աշխատանքը» դեռ չավարտված` շարքից դուրս է եկել:
Մեր տեղեկություններով` իշխանությունները պահանջել են, որ շինարարական ընկերությունը կամ քաղաքաշինության նախարարության համապատասխան պաշտոնյաները, այդ թվում` Վարդան Վարդանյանը, հափշտակած գումարները վերադարձնեն: Բայց քանի որ շինարարը մահացել է, ինչպես կառավարության համապատասխան նիստի ժամանակ հայտարարեց նախագահ Սերժ Սարգսյանը, փոխհատուցման պատասխանատվությունն ընկնում է հիմնականում Վ. Վարդանյանի վրա:
Ավելացնենք նաև, որ քաղաքաշինության ոլորտում չարաշահումների մասին առաջիկայում հավանաբար նոր բացահայտումներ կլինեն:
