Քաղաքական շրջանակներում քննարկվում է, որ ԲՀԿ մամլո խոսնակ Տիգրան Ուրիխանյանի անունից վարչապետ Տիգրան Սարգսյանի և «Ֆլեշ» ընկերության սեփականատեր Բարսեղ Բեգլարյանի մասին մամուլում տարածված մեղադրական հայտարարության հեղինակն իրականում ԲՀԿ-ական պատգամավորը չէ: Շրջանառվող խոսակցությունների համաձայն, այն գրել և տարածել է նախկին նախագահ Ռոբերտ Քոչարյանի մամլո խոսնակ Վիկտոր Սողոմոնյանը:
Ընդհանրապես կարծիք կա, որ նախկինում նույնպես ԲՀԿ-ի, նույնիսկ ԲՀԿ ղեկավար Գագիկ Ծառուկյանի անունից տարածված որոշ հայտարարություններ հրապարակվել են նույն կերպ: Ասում են՝ որոշ դեպքերում այդ հայտարարության մասին պարզապես տեղյակ են պահել Գ. Ծառուկյանին, որոշ դեպքերում նույնիսկ հարկ չեն համարել տեղյակ պահել: Եվ պատահական չէ, որ ՀՀԿ-ական որոշ պատգամավորներ արդեն մեկնաբանություններ են անում, թե թող Գ. Ծառուկյանն ինքն անձամբ հնչեցնի այսօրվա հայտարարության մեջ Տ. Սարգսյանին և Բ. Բեգլարյանին ուղղված մեղադրանքները:
«Առաջին լրատվականը» փորձեց Տ. Ուրիխանյանից ճշտել՝ ի՞նքն է այդ հայտարարության հեղինակը, թե՞, շրջանառվող լուրերի համաձայն, դա իր անունից տարածվել է Ռ. Քոչարյանի գրասենյակից: Տ. Ուրիխանյանը «Առաջին լրատվական»-ի հետ զրույցում կտրուկ չհերքեց, ոչ էլ հաստատեց, որ այդ հայտարարությունն ինքը չի գրել: Նա ծիծաղելով՝ ավելացրեց. «Տիգրան Ուրիխանյանը ծիծաղեց այդ պնդման, այդ խոսակցության կապակցությամբ. սա է պատասխանը: Կարծում եմ, որ իմ ինտելեկտի մասին հայտնի է բոլորին, ովքեր իրենց կարող էին այդպիսի միտք թույլ տալ: Ես ունակ եմ իմ համոզմունքները, կարծիքներն ու տեսակետները արտահայտել ինքնուրույն»:
