Ընտրողների խումբը, որը պնդում է, թե ամերիկահայերը դարձել են քաղաքականապես այնքան փորձառու և լավ ֆինանսավորված, որ մենաշնորհել են Գլենդելի քաղաքային քոլեջի Հոգաբարձուների խորհուրդը, դատական հայց է ներկայացրել` պահանջելով քվեարկության համակարգի փոփոխում` ընդարձակ մեթոդից համայնքի վրա հիմնված մոդելի: Այս մասին հաղորդում է Glendale News Press-ը:
Հայցը, որը Լոս Անջելեսի Գերագույն դատարան է ներկայացվել օգոստոսի 15-ին, խոսում է այն մասին, որ Գլենդելում խախտվում է Կալիֆոռնիայի քվեարկության իրավունքի ակտը, և որ ընդարձակ մեթոդը հանգեցրել է դպրոցի մենաշնորհման:
5 հոգանոց խորհրդում ներկայում ներառված է 2 ամերիկահայ, երկու տեղացիներ և մեկ լատինաամերիկացի:
«Մենք լավ ենք զգում խորհրդում ներկայացվածության համար,- ասել է քոլեջի հոգաբարձուների խորհրդի նախագահ Արմինե Հակոբյանը:- Մենք բավականին բազմազան խորհուրդ ունենք, ինչն էլ հայցի թիրախն է»:
Ընդարձակ ընտրությունները, ինչպիսիք Գլենդելում են, հնարավորություն են տալիս թեկնածուներին առաջադրվել և ընտրվել` անկախ այն բանից նրանց բնակության հասցեն գտնվո՞ւմ է դպրոցի ընդգրկած հասցեներում, թե՝ ոչ: Իսկ համայնքային մոդելը խորհրդում հավաքում է դպրոցի իրավասության տակ գտնվող տարածքի տարբեր հատվածների թեկնածուների:
5 հայցվորների պահանջը դատարան է ներկայացրել իրավաբան Մայքլ Միլերը, որը քոլեջում աշխատում է որպես խոսքի և բանավեճի ուսուցիչ: Հայցով պահանջվում է ընդարձակ ընտրություններից անցնել համայնքային մոդելի:
