Հույս չունենք, որ պետությունը կլուծի մեր բնակության վայրի հարցը: Այս մասին «Առաջին լրատվական»-ի հետ զրույցում տեղեկացրեց չորս ամիս առաջ Հալեպից Հայաստան ժամանած սիրիահայ Գոհար Ադիլխանյանը, որին դեռևս չի հաջողվել լուծել իր բնակության վայրի հարցը: Նա տեղեկացրեց, որ Հայկական Կարմիր Խաչի ընկերությունն է զանգահարել, փորձել ծանոթանալ հայաստանյան կյանքին ինտեգրման գործընթացին, կարիքներին:
Գոհար Ադիլխանյանի խոսքով` Հայկական Կարմիր խաչ ընկերությունը նաև կացարան տրամադրելու առաջարկով է հանդես եկել: «Կացարան ստանալու համար տեղ ցույց տվեցին շատ հեռու մի վայրում` Չարբախ թաղամասից շատ հեռու, սակայն նախապես մտածել էինք, թե նորմալ պայմաններ են, բայց ոչ: Շենքը նոր էր, բայց քաղաքից շատ կտրված` Չարբախից ահագին հեռու:
Դեռ բնակության վայրի լուծումը չկա, անորոշ վիճակում ենք, ամուսինս այնտեղ է, հիմա մայրիկիս տանն ենք ապրում ես և քույրիկիս ընտանիքը: Այստեղ մենք բնակարանի կարիք ունենք, կցանկանայինք թեկուզ մեկ սենյականոց բնակարան, որովհետև կացարանում ասում են, որ պետք է բնակվենք այլազգիների հետ: Բայց պետությունից հույս չկա, որ նման բան հնարավոր է»,- ասաց Գոհար Ադիլխանյանը` շարունակելով, որ իր ընտանիքի ունեցվածքը Հալեպում չեն կարողանում վաճառել, որ այստեղ բնակարան գնեն, բոլոր սիրիահայերն այսօր այս վիճակում են: Ըստ նրա` Հալեպում իրենց ունեցվածքը գնահատվում է չափազանց էժան, և դրանով հնարավոր չէ բնակարան գնել Հայաստանում:
Նա նշեց, որ անորոշ վիճակում են և չգիտեն, թե ում, որ կազմակերպությանը կարող են դիմել ու լուծել իրենց բնակության վայրի հարցը:
