ԼՂՀ նախագահ Բակո Սահակյանի մամլո խոսնակ Դավիթ Բաբայանը, մեզ հետ զրույցոմ գնահատելով երեկ Աստրախանում կայացած Սարգսյան-Ալիեւ-Մեդվեդեւ եռակողմ հանդիպումը, հայտարարեց, որ կարելի է ասել, որ այդ հանդիպումը ինչ-որ առումով տարբերվում էր մյուս նման հանդիպումներից: Ըստ Բաբայանի` ամենակարեւոր տարբերությունն այն էր, որ երեկվա հանդիպման արդյունքում ռազմագերիների վերադարձի հետ կապված պայմանավորվածություն է ձեռք բերվել կողմերի միջեւ: Սակայն Դավիթ Բաբայանի խոսքով, ինքը չի կարծում, թե քաղաքական տեսանկյունից, այսինքն` ԼՂ հակամարտության կարգավորման բանակցային գործընթացի առումով կարող է բեկում լինել, քանի որ կողմերի միջեւ շարունակում է մեծ անջրպետ լինել: Հետեւաբար` ԼՂՀ նախագահի մամլո խոսնակը քիչ հավանական է համարում, որ կողմերը մեկ ամսվա ընթացքում, այսինքն` մինչեւ Աստանայում կայանալիք ԵԱՀԿ անդամ երկրների նախագահների գագաթնաժողովը որեւէ համաձայնության կգան: Այն, ինչի մասին երեկ ակնարկում էր Մեդվեդեւը: «Հավանական չեմ համարում, որ Աստանայում կարող է ինչ-որ բան ստորագրվել»,- նշեց Դավիթ Բաբայանը` հավելելով, որ ՌԴ նախագահի հայտարարությունը արդեն մի քանի անգամ հաջող կիրառված փորձ էր` բանակցային գործընթացին արհեստական շունչ տալու առումով:
