Հայաստանի նախագահի, Ազգային ժողովի ու կառավարության աշխատակազմերի պահպանմանն ուղղվող ծախսերը եկող տարի ավելի շատ են աճելու, քան բյուջեի ծախսերի կամ պետական այլ հաստատությունների պահպանման ծախսերի միջին աճն է: Սա երևում է 2010 թվականի հաստատված բյուջեի և 2011 թվականի բյուջեի նախագծերի համապատասխան հոդվածների համեմատությունից: Այսպես, 2010 թվականի հաստատված բյուջեի համեմատ 2011 թվականի պետական բյուջեի նախագծով ՀՀ նախագահի աշխատակազմի պահպանման ծախսերի աճը մոտ 9.6% է, որը զգալիորեն գերազանցում է եկող տարվա բյուջեի ընդհանուր ծախսերի աճին (6.7%): ՀՀ նախագահի աշխատակազմի պահպանման ծախսերի այդ աճը` 9.6%-ը, զգալիորեն գերազանցում է նաև օրենսդիր, գործադիր ու դատական իշխանության բոլոր մարմինների (ներառյալ` նախարարություններ, մարզպետարաններ և այլն) ծախսերի միջին աճին (6.1%):
ՀՀ կառավարության աշխատակազմի պահպանման ծախսերը կաճեն 12.6%-ով, իսկ ԱԺ աշխատակազմի ու պատգամավորների պահպանման ծախսերը` 8.4%-ով: Ինչպես երևում է, երկու դեպքում էլ ծախսերի աճը գերազանցում է բյուջեի ընդհանուր ծախսերի, ինչպես նաև պետական բոլոր մարմինների պահպանման ծախսերի միջին աճին: